Ny trangan-javatra mahonena iainan’ny
mponina any amin’ny tapany atsimon’ny nosy manontolo faramparany izao,
ny fitotonganan’ny fandehanan-draharaham-pitondrana mikorosy fahana,
ny fihazakazaky ny fahantran’ny sarambabem-bahoaka ary fihetsik’ireo
mpanao politika mpanararaotra tato ho ato dia mitaky ny hizoran’i
Madagasikara sy ny Malagasy amina lalana mihilangilana
an-tampon-tsolatra tsy hahavery azy anaty kizo sy ny kobaka am-bava
mampikatso sy mandoto ny dinika politika.
Mikendry ny hanala ny Malagasy amina
adiady madinika sy antso an’efitra tsy mahomby ny Antoko PSD ka
manolo-kevitra ny hihetsehan’ny hery rehetra, handrafetana
fiaraha-mientana sy fampihaonana ny fahasamihafana.
Ainga vao miendrika fanamby marina tsy
mbola nisy toy izany teo amin’ny Tantaram-pirenentsika no maka faka, dia
ny : fahaterahana Fitondram-bahoaka mifanaraka amin’ny vanim-potoana
ankehitriny,matanjaka sy tsy mivaky, mirehareha amin’ny fahasamihafan’ny
faritra ao aminy ; fiekena fisiana soritra iombonana mirafitra sy
mivoatra anatina drafi-pitondrana miainga avy amin’ireo
fomban-drazana loharano sy lakandranon’ny ribam-pirenentsika, ny
fanasinana ny maha-olona iombonana maneran-tany, ny demokrasia sy ireo
zo fototra, sy ny fankatoavana ny fiambonian’Olombelona, ny
fisokafanaamin’izao tontolo izao ary ny fiaraha-midiniky ny samy
firenena sy fifanatonan’ny riba samihafa.
Ireo Sori-dalana sy Andry valo natolotry
ny fanavaozam-pitantanana ny antoko PSD ny 23 Aogositra2012 no tsy
maintsy hahatò izany fanamby izany. Voasoritra tanatin’izany : ny
fanomezan-kasina ny faritra malagasy (1) anatina Fitondrana foibe
matanjaka na manaja ny fahavitan-tenam-paritra sy ny filàna ny
fitsinjaram-pahefana mirindra (2) ; ny fametrahana : Drafi-pandaminana
iray sady sori-dalana no tari-dalana, ilay hoe « Madagasikara Tia
Fandrosoana » miaraka amin’ireo tanjony fito (3) ampiarahana amina
Politikan-kolontsaina mametraka ny hambom-pon’ny fahasamihafana (4) tsy
misaraka amin’ilay Drafi-pampivoarana ny tanora malagasy antsoina hoe «
Tanora Mijoro » (5) ; « Dinam-piaraha-monim-pirenena » iray izay
ikendrena ny hampatanjaka ireo sokajin’olona marefo anaty
fiarahamonina,hampanjary ny fiombonam-piaraha-miaina sy ny soatoavina
repoblikanina (6) izay mifanindran-dalana mandrakariva amina
fitantanan-draharaham-pitondrana tena lahika, antoka tokana
hofampanajana ny fahalalahana ara-pinoana sy ny fepetran’ny fitoviana
(7) ; Fiverenana arahina fitobohana amina demôkrasia manara-penitra izay
mitaky ny famerenana ny Lalàm-panorenan’ny Repoblika Fahatelo sy ireo
andrim-pitondrany, satria ny fahatapaham-pitantanana tsy nifanaraka
tamin’ny lalàm-panorenana tamin’ny volana marsa 2009 dia tsy tokony
hametraka fiovana fototra ankatoavin’ny lalàna velively izay heverina
hifanaraka amin’ny toe-draharaha misy sy ny
zava-misy anivon’andrim-pitondrana ; fa hampidi-doza ny fankatoavana ho
ara-dalàna izay rehetra mety ho fampiasan-kery ny mifanohitra amin’izay
(8).
Rindran’asa voafantina sy miandalana
anatina toe-tsaina vonon-kanarina sy vonon-kanorina no
hahatanteraka izany rehetra izany, rahefa hain’ny Malagasy ny mifanaja sy
miombona.
Ireo fifamotoana hiantsoan’ny antoko PSD
ny rehetra handrafetana izany rindran’asa izany dia tsy ikendrena
fotsiny ny ho fiatreham-pifidianana samihafa fa tafiditra indrindra
ihany koa anatin’ilay fomba fiasa manasina ny fandraisan’anjara mavitriky
ny olom-pirenena tsy anavahana. Amin’izay,samy hahatsiaro ho
tompon’antoka ny isam-batan’olona ka samy hahita ihany koa izay ho
anjaratoerany ao anatin’izany. »Ny fandrosoana sy ny fampandrosoana,
mandala sy mitsinjo ny maha-olona ».
Aucun commentaire:
Enregistrer un commentaire