Marc Ravalomanana: Tsy mety maty ao am-pon'ny malagasy

Mihazakazaka dia mihazakazaka ny fotoana,ary dia mihazakazaka toy izany koa ny toe-draharaham-pirenena eto Madagasikara.

Raha tsiahivina kely ny tantara dia efa ho telo taona sy tapany sahady izay no nisian’ny fanonganam-panjakàna navaivay sy feno habibiana teto amin’ny Firenena.

Fanonganam-panjakàna izay nitarika an’i Madagasikara ho ao anatin’ny haizin’ny fahantràna sy tsy fandriampahalemana  tanteraka.

Zovy tokoa moa no tsy hitsangam-bolo sy tsy ho vaky fo raha mahita sy mahatsapa ny fahapotehan’ny Firenena ankehitriny ?

Tao anatin’ny telo taona monja dia nahatratra an’aliny maro ireo zaza Malagasy voatery nandao ny sekoly ary lasa nanatevin-daharana  tsy fidiny ireo Ray aman-dreniny eo amin’ny sehatry ny fitadiavam-bola.

Tao anatin’ny telo taona monja dia nitombo izay tsy izy ireo ankizivavy kely tsy ampy taona voatery mivaro-tena noho ny fahantrana.

Tao anatin’ny telo taona monja dia tafiditra ao anatin’ireo Firenena mahantra indrindra eto ambonin’ny tany i Madagasikara,ary indrisy fa dia mitana ny rambony mihitsy aza eo amin'ny filaharana.

Tao anatin’ny telo taona monja dia orinasa ampolony maro no potika sy rava teto Madagasikara izay niteraka tsy fananan’asa ho an’ireo Malagasy an’aliny maro.

Ny mahagaga sy mahatalanjona dia mbola mitohy mandraka ankehitriny tsindry hazo-lena mahazo ireo orinasa tapa-porohana sisa tsy may tamin’ny fandrobàna sy fanapotehana nandritra ny taona 2009 ireo raha tsy hitanisa hafa tsy ny fahavoazana goavana mahazo ny orinasa Tiko ,izay azo lazaina fa efa tena mandohalika tanteraka ankehitriny.

Ilaina ve ny mampatsiahy fa namelona mpiasa sy tantsaha an’aliny maro izany orinasa izany ary nanana ny naha izy azy sy lanjany teto amin’ny Firenena sy ny kaontinanta Afrikana mihitsy aza teo amin’ny kalitao sy teknolojia.

Tao anatin’ny telo taona monja dia niakatra avo dia avo ny tahan’ny tsy fandriampahalemana teto amin’ny Firenena.Tsy misy andro iray tsy ahitana amin’ny gazety sy vaovao mikasika ny fanafihana ataona andian-jiolahy mirongo fitaovam-piadiana eto andrenivohitra sy ny manodidina.

Ny any amin’ny faritra tsy lazaina intsony raha tsy hitanisa hafa tsy ny herisetra sy habibiana miseho any amin’iny faritra atsimon’ny Nosy iny fotsiny(Betroka).

Amin’izao tetezamita vokatry ny fanonganam-panjakàna izao no misy izany fokonolona mahavita mamono olona anjatony izany ao anatin’ny iray andro monja.Mampalahelo fa izany no zava-misy ankehitriny.Mifamono ny samy Malagasy vokatry ny fahantràna sy tsy fandriampahalemana ary tsy fandraisan’andraikitr’ireo mpitandron’ny filaminana ara-potoana ny zava-doza misy.

Raha tsy hitanisa hafa tsy ireo isika dia maro ny toe-javatra mampalahelo misy eto amin’ny Firenena nandritra izay telo taona izay.

Toa lasa nanao dia miverina any amin’ny dimapolo taona lasa ny Firenena  manoloana ny fahantràna sy tsy fandriampahalemana goavana iainan’ny Malagasy ankehitriny.

Mitombo isa isan’andro ireo mpiray Tanindrazana miaina anaty fahantràna sy fahoriana.

Mitaintain-dava toy ny saobakaka ambody riana ny vahoaka ary mandry an-driran’antsy isan’alina vokatry ny asan-jiolahy sy dahalo.

Ireo mpitandron’ny filaminana mba antenaina variana tanteraka amin’ny zavatra hafa mba tsy hilazàna azy hoe tafiditra lalina amin’ny resaka politika.

Amin’izao tetezamita izao no misy izany mpitandron’ny filaminana (polisy,zandary,miaramila) tambazana vola izany vao manaiky manao ny asany.Araka ny vaovao ohatra dia manodidina ny 3000 Ariary ka hatramin’ny 4000 Ariary isan’andro no tambim-bola omena ireo mpitandron’ny filaminana tsotra izay miady amin’ny dahalo any amin’iny faritra atsimon’ny Nosy iny ankehitriny.Tambim-bola isan’andro ankoatra ny karama fandray isam-bolana io.

Ny an’ireo manam-boninahitra moa dia tsy lazaina intsony ankoatra ny fiakarana galona matetika dia matetika.

MATOA MANOVA FITONDRANA,MATOA MANONGAM-PANJAKANA DIA MAHAVITA TSARA LAVITRA FARAFAHARATSINY TSARATSARA KOKOA NOHO NY FITONDRANA NISY TEO ALOHA.

Raha ireo voatanisa eo ambony ireo no jerena dia maizina tanteraka ny fiainan-dramalagasy .

Raha ny fanamarihana nataon’ny  solo-tenan’ny masoivoho amerikana miasa sy monina eto Madagasikara ohatra dia mazava fa mandalo lalana sarotra tsy manam-paharoa i Madagasikara ankehitriny vokatry ny krizy ara-politika sy sosialy nateraky ny fanovam-pitondràna tsy ara-dalàna tamin’ny taona 2009.

Mampalahelo nefa fa na dia fahoriana sy fahantràna toy izany aza no mianjady amin’ny ankamaroan’ny Malagasy dia mbola misy ihany ireo olom-bitsy maniry sy mitady ny fomba rehetra hitohizany sy hampaharitra ny krizy.

Olom-bitsy izay minia manakipy ny masony sy ny feon’ny fiheritreretany manoloana ny hirifiry sy fahantràna lalina mahazo ny mpiray Firenena aminy.

Olom-bitsy izay mihevitra fa mahasolo-tena ny Malagasy roapolo tapitrisa ka manao izay saim-patany manoloana ny fitantanana ny tetezamita ankehitriny.

Lasa vorona azon’adala sisa ny fahefàna ankehitriny ka izao bodo sy adala rehetra izao dia mampiasa ny miaramila sy ny fitsaràna avokoa amin’izay tiany hanaovana azy mba hahafahany mipetraka maharitra eo amin’io seza sy fitondràna tsy ara-dalàna sy tsy nandalo safidim-bahoaka io.

Amin’ny maha olom-pirenena sy maha Malagasy dia mipetraka ihany ny fanontaniana hoe nentin’ireo mpanongam-panjakàna aiza moa ny Firenena ankehitriny?Telo taona mahery lasa mantsy izay dia tsy mba toy izao loatra ny zava-nisy teto amin’ny Firenena fa hafa mihitsy.

Nisy ny tsy fandriampahalemana fa tsy nihoa-papana toy ny misy amin'izao fotoana.Nisy ny fahantràna fa tsy nahazo vahana sy nampiteny ny moana toy ny iaraha-mahita ankehitriny.

Telo taona mahery lasa izay dia tsy nitsaha-nitombo ny isan’ny zaza Malagasy miditra an-tsekoly.Nihezaka ny fitondràna (voafidim-bahoaka) tamin’izany namatsy fitaovana sy fanampiana ireo mpianatra,indrindra ireo madinika sy sahirana mba hampazoto azy ireo sy hahazoany vokatra tsara(fitaovam-pianarana,aron’akanjo,ronono,sns…)

Telo taona mahery lasa izay dia mbola maro ny orinasa nihodina tsara sy nisokatra ary tsy may ka nanome asa ireo mpiray Tanindrazana an’aliny maro.

Telo taona mahery lasa izay dia làlana an’aliny kilaometatra maro no  voaforona sy vita manerana an’i Madagasikara ka nanamora ny fivezivezena sy fifaneraseran’ireo Malagasy maro.Nanamora ihany koa ny fivezivezen’ireo vokatry ny tany sy nahafahana namoaka izany tamin’ireo faritra saro-dalana taloha.

Tsy hitanisa hafa tsy ireo isika ary farafaharatsiny tamin’izany fotoana izany mba olona voafidim-bahoaka sy neken’ny Malagasy rehetra tamin’ny alalan’ny fifidianana no nitondra ny Firenena.Ankehitriny,inona no zava-misy?Aiza ho aiza no misy ny Firenena sy ny fiainan’ny vahoaka Malagasy ?

Matoa nanongam-panjakàna,matoa nanova fitondràna (lanim-bahoaka) dia manana antoka fa mahavita tsara noho ilay fitondràna nahongana sy nesorina.Raha tsy izany no miseho dia famonoana Firenena tsotra izao sy fisolokiana ary fanaovana tsinontsinona ny vahoaka Malagasy nametraka fanantenana sy fitokisana tamin’ilay fitondràna sy fahefàna teo aloha no mitranga.

Ilaina ve ny mampatsiahy hatrany fa fahefàna sy fitondràna napetraky ny vahoaka Malagasy tamin’ny alalan’ny fifidianana indroa nisesy no nisy teto talohan’ny fanonganam-panjakàna ?Fifidianana indroa nisesy izay vita nandritra ny fihodinana voalohany avokoa (1^er tour dia vita) izay mampiseho fa tsy nisalasala ary natoky ireo Malagasy mpifidy nametraka sy nanamafy ny fitokisany  tamin’izany fitondràna izany.

Eo amin’izay resaka fifidianana izay indrindra dia fantatra izao raha tsy misy indray ny fiovàna amin’ny fotoana farany fa hotanterahina amin’iny taona ho avy iny (2013) ny fifidianana Filoham-pirenena eto Madagasikara.

Ho an’ny rehetra,na ny mpanao politika,na ny olo-tsotra na ireo vondrona iraisam-pirenena mpanelanelana sy mitady vahaolana ho an’i Madagasikara dia mazava ny resaka fa tsy misy hafa tsy ny fifidianana ihany no vahaolana hivoahana amin’ny krizy.

Samy efa mihomana fatratra amin’izany avokoa ireo rehetra handray anjara .Eny fa na dia ireo mpanongam-panjakàna aza dia mihomana mafy amin’izany fifidianana izany ihany koa ary nandritra ny telo taona izay dia tsy nitsahatra nanao fampihelezan-kevitra  ry zareo na eny ankianja na eny amin’ny haino aman-jery rehetra eny .

Marihina fa misy ny lalàna sy sazy iraisam-pirenena mandrara ireo mpanongam-panjakàna  mba tsy ho azo fidiana intsony eo amin’ny Firenena misy azy(Accord de Cotonou) Saingy hatreto aloha raha ny zava-misy dia mijanona ho soratra fotsiny izany lalàna izany.Ho hita eo ny tohiny !

Etsy andanin’izany dia tsy milavo lefona ny Filoha Ravalomanana ary tsy mitsahatra manome toky sy mankahery ireo mpanohana sy mpanara-dia aminy manerana ny Nosy na dia eo aza ny tsindry hazo lena sy ny ady sarotra atrehany isan’andro nandritra izay telo taona nisian’ny fanonganana azy izay.

Tsy vahiny amin’ny fifidianana Filoham-pirenena raha ny Filoha Ravalomanana,ary mahafantatra izany tsara ny vahoaka Malagasy.

Mahafantatra tsara izany ihany koa ireo rehetra handray anjara  sy hifaninana aminy amin’izany fifidianana izany.

Manoloana izany dia misy ireo mitady ny fomba ratsy sy mamohehitra rehetra mba hanakanana ny Filoha Ravalomanana  tsy ho tafody an-tanindrazana ary mba tsy hahafahany mandray anjara amin’ny fifidianana.

Natao izay fomba nanalàna azy teto amin’ny Firenena(Herisetra,basy,fampihorohoroana).Rehefa izany dia atao indray izay fomba rehetra hanakanana azy tsy hiverina eto intsony raha tsy vita ny fifidianana.

Nivoaka ny NOTAM maro,ary lasa voambolana hain’ny Malagasy vetivety teo mihitsy aza izany.

Atao takalon’aina ny fananany sy ny orinasany,atao izao karazana fitsarana rehetra izao hiapangàna sy hanendrikendrehana azy ary hanamelohana azy,saingy hatramin’izao dia tsy kivy ary tsy mihemotra ny Filoha Ravalomanana.

Nandritra ny telo taona mahery no nanao ny fomba rehetra hanaratsiana azy ny mpifanandrina aminy,nandritra ny telo taona mahery no efa nangalatra « départ » amin’ny fanaovana propagandy ireo andian’olona eo amin’ny tetezamita ankehitriny izay nanongana ny fitondràny,nandritra ny telo taona no nanapotehana ny fananany (Tiko,Magro,MBS,sns..) mba tsy hananany hery intsony,saingy na eo aza izany rehetra izany dia mbola TSY NIOVA RANGAHY INY, Mbola tsy niova ny Filoha Ravalomanana fa atahorana foana amin’ny fifidianana Filoham-pirenena.

Mbola tsy niova i Dada. Fantany ny zavatra nataony teto amin’ny Fireneny,ary tsy adala ny Malagasy izay nametraka ny safidiny sy fitokisana taminy indroa nisesy,na dia eo aza ny fafy lainga sy fanaratsiana (diabolisation) ataon’ireo fahavalony izay mazava loatra fa matahotra ny safidim-bahoaka.

Telo taona maninjitra izay no niainan’ny Firenena sy ny vahoaka Malagasy tao anaty haizin’ny fahantràna.Haizin’ny fahantràna izay tsy nandalo safidy na teneràna akory fa ankaterena tsotra izao no nitondran'ireo mpanongam-panjakàna azy teo.

Ny lasa hono tsy fanadino mba hibanjinana ny ho avy.Telo taona mahery izay ampy nisaintsainan’ny Malagasy tsara ny zava-misy sy ny fanampahan-kevitra tokony horaisiny amin’ny ho avy.

Fampihelezan-kevitra 2001...

Ho an’ny Filoha Ravalomanana koa dia ampy izay,ary hentitra sybnazava ny teniny raha niantso an-tarobia ireo vahoaka mpomba azy tany Toliara izy ny faran’ny herinandro teo :"Aza matahotra...aza manahy...1er TOUR DIA VITA!!!"

D.R.