Lalao Ravalomanana: Vonona tanteraka hanangana indray ny Firenena

Dia mahagaga sady mampalahelo ny fahasahian’ireto kandidà maro be mampanantena fandrosoana sy filaminana ho an’i Madagasikara ao anatin’ny fotoana fohy.Nandritra ny efa-taona anefa dia ny ankamaroan’izy ireo ihany no nampandohalika sy nandrotidrotika tanteraka an’ity Firenena ity ka mahatonga ny Malagasy hiaina tanteraka anaty fahantràna sy tsy fandriampahalemana manara-penitra ankehitriny.

Tsy tahotra tsy henatra dia mahasahy mamerina ny fisolokiana sy fanambakàna ny mpiray Tanindrazana aminy indray toy ny nataony efa-taona lasa izay ry mpanongam-panjakàna isany.

Tao anatin’ny efa-taona monja dia nitotongana izay tsy izy ny farim-piainan’ny ankamaroan’ny Malagasy.Mahatratra an’hetsiny maro ireo mpiray Tanindrazana very asa tsy fidiny vokatry ny krizy sy ny fanonganam-panjakàna,ary torak’izany koa ny isan’ireo ankizy mpianatra izay voatery mandao tsy fidiny ny sekoly ary lasa manamaro isa ireo Ray aman-dReniny eo amin’ny sehatry ny fitadiavam-bola.

Ny horohoro sy tebiteby isan’andro tsy lazaina intsony fa dia mandry andriran’antsy tsy tapaka ny fiaraha-monina vokatry ny tsy fandriam-pahalemana mahazo vahana tanteraka ankehitriny.

Etsy ankilan’izay ireo mpanongam-panjakàna nampanantena mana sy edena teny an-kianja vao nahazo ny seza sy fahefàna notadiaviny dia ny tombotson’izy ireo sy ny paosiny no nofenoiny mialoha.Tsy nanao PMU ireo na nanao lalao hafa mba hahazoana vola be kanefa dia volana vitsy monja nandrombahany ny fitondràna dia lasa mpanefoefo sy miliaridera avokoa.Dia gaga ianao hoy ny fitenin’ny tanora izay!

Efa betsaka ny rano-mainty lany sy ady hevitra vita mikasika izany nandritra izay efa-taona nisian’ny fanjakàn’i Baroa izay ka tsy asiam-panazavàna be intsony.Tsy ringana ho azy amin’izao tsy akory ireo harem-pirenena sy andramena (bois de rose) Malagasy,ary tsy nihitatra ho azy amin’izao koa ny tetezamitatra fa nisy antony tao.

Ankehitriny dia tonga ihany ity ny fifidianana (raha tsy hisy indray ny teti-dratsin’ireo olom-bitsy matahotra safidim-bahoaka).Fifidianana madio sy mangarahara tokoa ve nefa no hisy? Hanana ny safidiny malalaka tokoa ve ny vahoaka Malagasy?

-Hatreto mantsy dia mbola ny ankamaroan’ireo mpanongam-panjakàna indray koa no mbola mameno lisitra hosafidianin’ny Malagasy,ary hanao izay fomba rehetra handrombahana fahefàna indray.Ankoatra ny fanaovana fampihelezan-kevitra mialohan’ny fotoana nandritra izay efa-taona izay dia eo koa ny fampiasàna sy famafazana ireo vola be tsy fanta-piaviana sy voahangona nandritra ny tetezamitatra.

Mora tokoa ny mizara sy mandany vola rehefa tsy nisasarana sy tsy nitsembohana ny nazahoana azy…Ary dia voavidiny sy voatampiny maso daholo hatramin’ireo mba noheverin’ny vahoaka ho hitsikitsika nivavahana.Tao ireo mba noheverina ho Ray aman-dReny sy kitro nifaharana amin’ny fampanajàna lalàna kinanjo lasa mpanao majia sy kajy sampontsampona toy ny hoe "49=50" ireo mba nantenaina ho tandroka aron’ny vozona kinanjo ireo fahavalon'ny fandrosoana indray no narovany.

-Ankoatr’izany dia amin’ny fomba ahoana moa no hisian’ny fitovian-jo eo amin’ireo kandidà mpifaninana raha toa ka ireo lazaina fa avy amin’ny fanjakàna dia afaka mampiasa Hainoamanjery (Radio sy Fahitalavitra) am-polony maro eo an-tanany ary afaka manampatra sy mivalapatra amin’izany amin’ny ora sy fotoana hitiavany azy.Ireo kandidà izay lazaina fa mpanohitra kosa dia tapenam-bava tanteraka ary tsy re feo sy tsy hita sary akory na dia any amin’ny Hainoamanjery lazaina fa fanjakàna aza (RNM,TVM).Tsara ny manamarika sy manantitrantitra fa mahatratra 77 isa mahery ireo Hainoamanjery nakaton’izao fitondràna tetezamita izao nandritra izay efa-taona nanjakàny izay.

Na dia eo aza anefa izany tsindry hazo-lena sy mizàna tsindrian’ila izany dia soa ihany fa misy ny olona sahy sy vonona tanteraka hanarina sy hanangana indray ity Firenena efa mandohalika sy potika tanteraka ity.Tamin’ny fomba feno habibiana sy herisetra no nanalàna sy nanosihosena ny zo sy safidin’ny vahoaka Malagasy efa-taona lasa izay.Efa-taona ihany koa nanjakàn’ny safidy sy feom-basy izay tsy nanao hafa tsy niaro sy nametraka fahefàna tsy ara-dalàna teo ambony fahoriana sy fahantràn’ny Malagasy.

Ankehitriny tonga ny fotoana hanambaran’ny Malagasy indray ny hery sy firaisan-kinany mba hanovàna ny tantara sy hanavotana an’i Madagasikara.Ny toky fitaka fa ny atao no hita ary anjaran’ny tsirairay no misintona lesona tamin’ny lasa rehetra mba hanamboarana sy hibanjinana indray ny ho avy vaovao.

Hoy Ramatoa Lalao Ravalomanana hoe: "Vonona aho hanangana ny rava,andao isika hiara-dia.Tsy adidiko samirery anefa fa adidiko Izaho sy Ianao."

Madagasikara Malalako