Marc Ravalomanana: “Ho porofointsika fa mandresy i Dr Robinson”

Nilaza ny heviny momba ny fifidianana fihodinana faharoa ny filoha teo aloha Marc Ravalomanana raha nitafa mivantana tamin’ireo mpanara-dia azy tetsy amin’ny Magro Behoririka ny talata lasa teo.

Misaotra an’Andriamanitra lehibe isika, hoy izy fa nandritra izay dimy taona izay dia tsy kivy tsy ketraka ny vahoaka Malagasy indrindra ny mpitolona teo amin’ny Magro, nitaky ny tany tan-dalàna, ny fanajana ny lalàmpanorenana, ny fihavanana. Niarahaba ny rehetra ary niarahaba manokana an’i Dr Robinson Jean Louis noho ny fahatratrarana ny Krismasy, izay nambarany fa Krismasim-pandresena Atoa Ravalomanana. Mampahery anareo aho ary ianareo ihany koa dia hampahery ahy, hoy izy. Enga anie ka hitondra fandresena ho an’ny vahoaka malagasy sy i Dr Robinson Jean Louis izao krismasy izao. Mahita izahay aty hoy i Dada fa niteny ny i Dr Robinson Jean Louis fa nitarika amin’ny fifidianana saingy ny mifanohitra amin’izay no lazain’ny sasany. Ny marina marina ihany ary ny marina tsy mba maty ka noho izany dia samia miasa miaraka hampiseho izany, hoy i Marc Ravalomanana. Miantso antsika rehetra aho, hoy izy, hiara-hitady ny porofo.

Tena mitebiteby ny Afrikana rehetra, indrindra fa ny SADC , ary vao aninkeho (ndlr: talata maraina) dia nampiantso ahy izy ireo ka niteny hoe ataovy haingana dia haingana ny hisian’ny porofo fa tena nandresy i Dr Robinson Jean Louis. Misaotra ny vahoaka Malagasy hoy i Marc Ravalomanana fa nampiseho fahendrena lehibe ary nampiaiky izao tontolo izao.

Ny ratsy tsy kely làlana fa mbola misy ihany ireo hosoka sy ny tsy rariny fanaparam-pahefana. Noho izany mijoroa ianareo ! Ankino amin’Andriamanitra ny asanareo, hoy hatrany i Dada ary aoka izy no hiambina ny vatotsika. Nohamafisiny ihany koa fa tsy miala eto amin’ny Magro isika raha tsy azontsika ny zavatra notakiantsika, dia ny tany tan-dalàna, ny fisian’ny fandriampahalemana, ny fihavanana, ary raha tsy tafaverina eto i Dada. 

Nanome hafatra ho an’ny tompon’andraikitra ihany koa ny tenany. “Aoka ianareo hiara-hiasa, ary aza kivy fa raha misy hevitra dia hifanampiana”.Mazava ny hafatr’i Dada : «tsy maintsy miady amin’ny tsy rariny sy ny tsy hitsiny isika ary tsy maintsy hijoro hatramin’ny farany amin’ny fahamarinana. Mivavaha ianareo !». 

Nanatrika ny hetsika teny amin’ny Magro Behoririka ny talata 24 desambra lasa teo moa i Dr Jean Louis Robinson sy ireo mpitarika avy ao amin’ny ankolafy Ravalomanana.

RTT

http://tiatanindrazana.com/