Marc Ravalomanana: Fototra goavana amin'ny "Fampihavanam-pirenena" sy ny "Fampandrosoana" an'i Madagasikara

Asa mafy, asa tsara niteraka vokatra

Iray volana androany izay no nangalàna an-keriny sy nanagadràna ny Filoha Marc Ravalomanana any Antsiranana.Tany amboalohany dia nofetsena sy nofitahina ny vahoaka fa ho fiarovana ny ainy no nanaovan’ny fanjakàna an’izao fihetsika feno herisetra sy fanaovana tsinontsinona ny zo mahaolona izao.Rehefa nandeha anefa ny fotoana dia niova tsikelikely teny an-dalana izany fampandriana adrisa marivo tototra izany ka vetivety dia nahitàna antotan-taratasy hanenjehana azy eo anatrehan’ny lalàna tampoka ny fanjakàna, ary mandraka androany dia lasa takalon’aina politika ny Filoha Ravalomanana.

Raha ny zava-manjo ny Firenena sy ny fiainan’ny vahoaka Malagasy ankehitriny no jerena, ary raha tena fanajakàna vonona hampandroso sy hampihavana marina no misy eto, dia tsy tokony any amin’ny fomba nahafahan’ny Filoha Ravalomanana niditra teto an-tanindrazana sy ny fikatsahana  ny fomba rehetra hanapotehana azy no handanian’ny fanjakàna fotoana fa kosa any amin’ny fitadiavam-bahaolana marina izay nandrasan’ny Firenena an-taonany maro mba hialàna amin’izao fahantràna lalina sy fahavoazan’ny Firenena izao.

Raha ny tena marina aza dia dingana lehibe mankany amin’ny fampihavanam-pirenena izay fototry ny fampandrosoana an’i Madagasikara no notontosain’ny Filoha Ravalomanana amin’izao fahatongavany eto an-tanindrazana izao satria anisan’ny fototra goavana takian’ny “Tondrozotra” ny fiverenan’ireo sesi-tany rehetra tsy misy fepetra eto Madagasikara. Tondro-zotra izay nodradradradraina nandritra ny dimy taona mahery na teto an-toerana na teo amin’ny sehatra iraisam-pirenena ny fitakiana amin’ny fanatanterahana azy saingy indrisy fa nijanona teo amin’ny fitakiana sy ny resa-be politika fampatoriana vahoaka fotsiny izany.

Manoloana izao dingana lehibe vitan’ny Filoha Ravalomanana izao, izay marihina tsara fa adidy sy andraikitra goavana tsy vitan’ny fianakaviam-be iraisam-pirenena (SADC, UA, UE, …) sy ny fitondràna teto Madagasikara nandritra ny enin-taona ny fanatenterahana azy dia fanagadràna sy fanaovana takalon’aina toy izao ve no mendrika azy ? Raha tsy hiresaka afa-tsy ny maha Filoham-pirenena voafidim-bahoaka in-droa nisesy azy fotsiny aza isika dia fanosihosena sy fanaovana tsinontsinona ny zo mahaolona toy izao ve no sahaza azy ?

Tsy efa ampy ve izay dimy taona ngarangidina poakatin’ny tetezamitatra nateraky ny fanonganam-panjakàna izay ? Tetezamitatra izay mbola mitohy mampitondra takaitra sy tarazo ratsy ho an’ny Firenena sy ny fiainan’ny vahoaka Malagasy ankehitriny.

Raha tany tan-dalàna marina i Madagasikara. Raha tsy misy tokoa ny fanaovana mizàna tsindrian’ila amin’ny fampiasàna ny fitsaràna sy ny mpitandro ny filaminana mba tsy hilazàna hoe fanaovana fitaovana politika ireo andrim-panjakàna roa ireo: Moa ny Filoha Ravalomanana irery ve no mendrika ny fanenjehana sy fanaovana tsindry hazo-lena toy izao?  Maro ireo tompon’andraikitra tena fototry ny olana sy nanapotika Firenena teto saingy odiana tsy asian-teny mikasika azy ireny raha tsy hitanisa afa-tsy ireo mpanongam-panjakàna izay mahakizo-fara ny fiainam-bahoaka toy izao sy fototry ny krizy tsy mety voavaha mandraka ankehitriny isika. Ao koa ireo mpanondrana antsokosoko, mpangalatra sy mpanao ampihi-mamba mihevitra ho fananan’izy ireo samy irery ny harem-pirenena izay harenan’ny Malagasy rehetra toy ny andramena (bois de rose), harena an-kibon’ny tany, ireo biby mitady ho lany taranaka rehetra,sns. Maro ny porofo sy antotan-taratasy azo hanenjehana azy ireny araka ny lalàna saingy toa jere-potsiny toy ny tany nahalavoana sy tsy mba voakitikitika izy ireny. Rehefa ampiharina ny lalàna dia ampiharina sy ampiasaina amin’ny tokony ho izy amin’ny rehetra fa tsy tokony hisy Malagasy zanak’Ikalahafa eto.

Lainga sy fanambakàna ny Malagasy ny fanambaràna etsy sy eroa fa sehatra kely ao anatin’ireo maro amin’ny fampihavanam-pirenena ihany ny anjara-toeran-dRavalomanana. Ny tena marina dia tsy afa-miala amin’ity Filoha mamim-bahoaka ity ny fampihavanam-pirenena, ary mitana andraikitra sy toerana goavana eo amin’ny fampandrosoana ny Firenena sy ny ho avin’i Madagasikara ny Filoha Marc Ravalomanana. Tsy azo odian-tsy hita ary tsy azo afenina izany.

Aleo hazava ny resaka fa Madagasikara nandroso sy niroborobo tanteraka no nisy teto nandritra ny fitondràn-dRavalomanana:

-Ambony dia ambony ary tsy nitsaha-niakatra ny tahan’ireo zaza Malagasy niditra an-tsekoly.

-Niroborobo sy nihazakazaka ny fanamboarana ireo fotodrafitrasa vaventy toy ny làlana, sekoly, hopitaly, tetezana sns

- Tao anatin’ny fotoana fohy dia niakatra avo ny tahan’ny harin-karena Malagasy ary nahatratra 7,5% izany izay tsy fahita firy aty Afrika.

- Natoky tanteraka ary tsy nisalasala ireo Firenen-dehibe sy mpamatsy vola iraisam-pirenena naira-nisa tamin’ny fitondràna Malagasy tamin’izany. Nisokatra tamin’ireo Firenena vahiny matanjaka maro i Madagasikara ary nisy ny fifaninanana teo amin’ny sehatra isan-karazany tamin’ny famatsiam-bola (Chine, Canada, Japon, Allemagne, Afrique du Sud, Etats-Unis, France, sns)

- Nanara-dalàna sy nizotra tsara ny fitantanana ireo orinasa goavana toa ny JIRAMA sy ny Air Madagascar:

*Tsy nisy ny olana ara-bola sy ara-teknika teo amin’ny fitaterana anabakabaka.

*Tsy niferin’aina sy nitaraina tamin’ny fahatapahan-jiro lavareny (delestazy) ny Malagasy.

-Sy ny sisa sy ny sisa

Natokisan'ireo mpitondra Firenena matanjaka...

Ny azo ambara sy tsy azo lavina dia nizotra soa aman-tsara tamin’ny lalan’ny fampandrosoana, ary nihazakazaka niala tamin’ny fahantràna i Madagasikara fony teo amin’ny fitondràna ny Filoha Marc Ravalomanana.

Azo atao ny manonofy sy maka sary an-tsaina ny toerana nisy ity Firenentsika ity ankehitriny raha nitohy soa aman-tsara izany fihazakazaky ny fandrosoana izany. Saingy mijanona ho nofy ihany sisa izanyvokatry ny fanonganam-panjakàna nataon’ireo fahavalom-pirenena.

Matoa nanongam-panjakàna ireo tompon’andraikitra tamin’izany izay iarahan’ny Malagasy rehetra mahafantatra hoe iza avy. Matoa nanova fitondràna tamin-kerisetra dia manana antoka fa mahavita tsaratsara kokoa noho ilay fitondràna nahongana. Mahavita mampandroso bebe kokoa ny Firenena noho ny fitondràna Ravalomanana. Saingy inona no zava-misy ankehitriny? Aiza ho aiza no misy ny Firenena Malagasy sy ny fiainam-bahoaka amin’izao fotoana izao? Anjaran’ny tsirairay no mamakafaka sy mamaly izany.

Araka ny voalaza etsy ambony dia feno iray volana androany ny nanagadràna sy nanaovana takalon’aina ny Filoha Marc Ravalomanana. Tsy nitsahatra namerimberina ny tenany fa vonona izy hitondra ny anjara-birikany amin’ny fanarenana ity Firenena izay latsaka ankaterena loatra ity. “Tonga hitondra fandrosoana sy fandriam-pahalemana” aho hoy izy ary "ny andro rehetra sisa iainako dia hanasoavako ny Fireneko".

Ry fanjakàna ô! Raha tena fampihavanam-pirenena marina no tanjona eto. Raha tena fampandrosoana an’i Madagasikara marina no himasoana eto. Sao lahy tsy tokony ho lany andro sy fotoana amin’ny fanapotehana ara-politika sy ara-ekonomika mba tsy hilazàna hoe famonoana sy fanimbàna tsikelikely amin’ny fomba mamohehitra rehetra olona iray izay nitondro soa sy fampandrosoana ity Firenena ity isika!

Samy Malagasy, samy olom-belona. Tsy misy tsy diso ary tsy misy tonga lafatra. Sao lahy dia fotoana tokoa izao hibanjinana ny ho avy ary hanararaotana hanatanterahana ny tena fampihavanam-pirenena marina!

Ry Malagasy! Maro isika no kivy sy miraviravy Tanana, very hevitra tanteraka manoloana ny zava-misy ankehitriny. Raha misy ilàna ny firedaredan’ny afom-pitiavan-tanindrazana ao anatintsika tsirairay dia amin’izao kihon-dalana manokana andalovan’ny Firenentsika izao.

Aoka tsy ho kivy na hitazam-potsiny isika satria antsika Malagasy rehetra i Madagasikara.

Ry Malagasy! Aoka hijoro ka ho mendrika tanteraka ny antsoina hoe olom-pirenena isika. Olom-pirenena tompon’andraikitra sy mandray anadraikitra eto amin’ny Tanindrazantsika.

Mijoroa ry Malagasy! Mitsangana ry Malagasy! Izao no andro sady ora satria mila antsika i Madagasikara. Mila ny firaisan-kina sy ny fitiavan-tanindrazana miboiboika ao anatintsika ny Firenena.

Efa niasa mafy sy niady mafy ho antsika sy ny Firenentsika ny Filoha Marc Ravalomanana: Tsy avelantsika hiady irery izy manoloana ny sedra goavana lalovany ankehitriny.

Mifohaza ry Malagasy!

Madagasikara Malalako