Fanambarana avy amin’ny Etat-Major Mixte opérationnel national (EMMONAT) - Mpitandron'ny filaminana tokoa sa mpitandron'ny fanakorontanana ara-politika?

Mpitandron'ny filaminana sa mpitandron'ny fanakorontanana ara-politika?

Mihazakazaka dia mihazakazaka ny toe-draharaha eto amin’ny Firenena ankehitriny. Miha mahazo rehitra hatrany ny afo mandoro ny fitondràna tetezamitan-dRajoelina  Mampiaka-peo sy manao fihetsiketsehana maneho tsy fankasitrahana ny fitondràna misy ankehitriny avokoa ny ankamaroan’ny hery velona sy ny mpiasam-panjakàna ary ny fikambanana maro samihafa misy eto amin’ny Firenena.

Eo ny raharaha Free FM sy ny fitakian’ny mpanao gazety, Mananontanona ao koa ny fitokonam-ben’ny mpiasam-panjakàna izay efa nialohavan’ny fitokonan’ny mpampianatra sy mpianatra ary ny mpitsabo mpanampy.Ankoatr’ireo rehetra ireo dia tsy mijanona fa vao maika mahazo hery ihany koa ny tolona ataon’ireo vahoaka « Zanak’i Dada » izay mitaky tsy misy hatak’andro ny fiverenan’ny Filoha Ravalomanana eto an-Tanindrazana.Tato anatin’ny herinandro vitsy izay dia mitohy ary mihamafy sy mahazo hery hatrany ny hetsi-bahoaka sy fanehoan-kevitra an-dalam-be (Ambohijatovo) izay ahitàna hatrany koa ny habibian’ireo mpitandron’ny filaminana izay zary lasa hery famoretana sy biby fampitahora ary fitaovana politika sisa.

Manoloana ny hafanàna ara-tsosialy sy ara-politika ankehitriny indrindra ary dia namoaka fanambaràna ny EMMONAT(Etat-Major Mixte opérationnel national).Eo anatrehan’izany fanambaràna izany nefa dia tsara ny mitondra ireto teboka vitsivitsy ireto :

-Oviana moa no nisy famoriam-bahoaka nahazo halalana teto indrindra tao anatin’izay telo taona nisian’ny fanonganam-panjakàna izay ?Na ny kianja lazaina fa kianjan’ny DEMOKRASIA aza basy sy tafondro no miaro azy mba tsy hahafahan’ny vahoaka maneho hevitra.

- Ho an’ny vahoaka dia lasa nofy ratsy sisa izany mpitandron’ny filaminana sy ny miaramila izany.Raha hiady tombotsoa sy karama be ary voninahitra dia voalohany fa raha tena handray andraikitra marina amin’ny maha mpitandron’ny filaminana sy tandroka aron’ny vozona  azy dia gisitra.

Mitombo isan’nadro ny tsy fandriam-pahalemana,ary mitombo isan’andro koa ireo olo-tsotra (maratra,voasambotra,maty,…)iharan’ny habibian’ireo miaramila sy mpitandron’ny filaminana hany ka tsy matoky azy ireo intsony ny vahoaka ka na ny manavaka azy amin’ny tena jiolahy sy dahalo aza lasa manahirana.

-Lasa fitaovana politika sy biby fampitahorana eo am-pela-tanan’olo-bitsy sisa ny mpitandron’ny filaminana sy ny miaramila.Very tanteraka ilay soatoavina ara-miaramila fahiny manao hoe « Ho an’ny Tanindrazana » fa toa lasa izay mahatolotolotra sy manam-bola ihany sisa no mibaiko.Tsy tandroka aron’ny vozona intsony no misy fa « Tandroka aron’ny fahefàna sy fananan’olom-bitsy ».Manoloana izany rehetra izany anefa dia mbola ilay vahoaka sy mpiray Tanindrazana efa iharan’ny tsindry hazo-lena hatrany no mbola mandoa ny karama sy ny tombotsoa mihoa-papana.

-Raha tena teknisiana marina ny mpitandron’ny filaminana fa tsy mpanao politika araka ny voalazany dia tsy tokony ho ny vahoaka no fahavalony fa ny mpanongam-panjakàna sy ireo rehetra manao tantely afa-drakotra ny harem-pirenena ankehitriny.

-Na inona ambara na inona fanazavàna entin’ny EMMONAT ;io fanambaràna ataony io dia mampiseho fa efa manomboka misy ny fivakisana eo amin’ny samy miaramila manoloana ny fihoaram-pefy sy ny famoretam-bahoaka ataon’ireo miaramila sy mpitandron’ny filaminana sasany izay mahazo baiko sy tombotsoa mivantana avy amin’ireo olom-bitsy manao fitaovana azy ankehitriny.

-Raha ny vaovao farany dia tonga nandroba sy nangalatra ireo fitaovana sisa tavela sy tapa-porohana sisa tsy main'ny Radio Mada sy MBS ireo milaza azy fa mpitandron'ny filaminana io hariva io.Mpitandron'ny filaminana miaro ny fananam-bahoaka sy ny fananany marina ireo be basy mahery fihetsika ankehitriny sa sônegaly mahazo baiko mpandroba sy mpangalatra.Izay lalovany rehetra dia voaroba sy mitondra faisana avokoa.

Zary lasa mpitari-bato vilam-bava ireo mpitandron'ny filaminana ankehitriny,hafa ny lazain'ny vava,hafa ny ataon'ny tànany...Satria tsy mba ho an'ny Tanindrazana intsony no tarigetra fa lasa HO AN'NY VOLAN'NY TANINDRAZANA!!!

Fanambarana avy amin’ny Etat-Major Mixte opérationnel national (EMMONAT)

Manoloana ny famoriam-bahoaka tsy nahazoana alalana nataon’ireo mpanao politika sy haino aman-jery sasan-tsasany sy ny fanambarana nataon’ny vondron’olona vitsivitsy tao ho ato, ary ireo vaovao tsy marim-pototra fampiadiana sy fampisaraham-bazana ny mpitandro filaminana dia manao izao fanambarana izao ny EMMONAT :

Voalohany, misaotra sy midera ny fihetsika nasehon’ny mpitandro filaminana avy ao amin’ny EMMOFAR, izay hitambaaran’ny zandarmariampirenena, ny tafika malagasy ary ny polisim-pirenena, nanatanteraka ny asany an-tsakany sy an-davany na dia nisy aza ireo fiantsiana maro samihava nandritra ny fanaparitahana ireo mpanao fihetsiketsehana.

Mampafantatra ihany koa fa tsy olon-tokana araky ny fiheveran’ny sasany azy no mandray fanapahan-kevitra eo anivon’ny mpitandro filaminana fa fanapahana iraisan’ireo mpitarika ny EMMOFAR manerana ny nosy no tanterahina manaraka ny baiko avty aminay EMMONAT araky ny lalana velona eto amin’ny Firenena. Amin’ny maha leaddern’ny EMMO faritany Antananarivo ny lehiben’ny frari-piadidian’ny zandarimariam-pirenena Antananarivo dia manao ny asa ampanaovina azy izy.

Ka na iza na iza no teo amin’ny toerany dia nitovy ihany ny fepetra noraisina eo anatrehan’ireny zava-mitranga ireny satria Lalàna mitovy no ampiharina ary mitovy ihany koa ny fihofanana atao mikasika ny fitandrovana ny filaminam-bahoaka.

Teknisiana ny mpitandro filaminana fa tsy mpanao politika. Tsy hilefitra amin’ny fampiharana ny Lalàna ny mpitandro filaminana satria natao ho an’ny olon-drehetra ny Lalàna ka tsy maintsy hisy ny fisamborana ireo minia mandika izany na mihoa-pefy fa indrindra ny fitondrana fitavam-piadiana ao anaty famoriam-bahoaka.

Manome baiko sy mankahery ny mpitandro filaminana rehetra izahay telo mirahalahy lehiben’ny EMMONAT mba hahatanteraka an-tsakany sy an-davany ny asa iandreketan’izy ireo araky ny Lalàna sy ny baiko omena fa tsy sanatria handairan’ny tsaho sy ny fampiadiana amin’ny alalan’ny haino aman-jery izay mety hiteraka fisaraham-bazana sy fifankahalana.

Général Bruno Razafindrakoto, commandant EMMONAT