SADC: Angady tsy matapak'ahitra eo anatrehan'ny miaramilan-dRajoelina?

Antoko politika vaovao ve ny Foloalindahy?

Araka ny hevitr’ireo miaramila raha nihaona tamin’ingahy Maruis Fransman izy ireo dia tsy hampisy fitoniana ny fiverenan’ny Filoha Ravalomanana eto Madagasikara,ary mety hitarika korontana izany.

Efa nampoizin’ny maro izany satria iaraha-mahalala tsara ny fifandraisana misy eo amin’ireo miaramila nanao fanambaràna ireo sy ingahy Rajoelina nanomboka ny taona 2009.(1) (2) (3)

Ny fanontaniana mipetraka dia tsotra ihany:”Misy fitoniana ve eto Madagasikara nandritra izay tsy nahateto ny Filoha Ravalomanana izay?”

Mety tony angamba ireo andian’olom-bitsy izay migoka tombotsoa goavana amin’izao tetezamita izao fa ho an’ny Malagasy maro an’isa dia nofy ratsy no iainany isan’andro nandritra izay efa-taona latsaka izay.

Ho an’ny besinimaro dia mazava tsara ny resaka fa ny miaramila sisa no hery ahafahan-dRajoelina mifikitra mafy eo amin’io (tetezamitatra )tetezamita io ary fantatry ny SADC tsara izany.

Raha ny nambaran’Ingahy Maruis Fransman ,iraky ny vondrona SADC ,talohan’ny niaingany teto Madagasikara dia hisy ny fihaonan’ny Malagasy rehetra na nanao na tsy nanao Sonia ny tondro zotra (Feuille de route) mba hitadiavam-bahaolana amin’ny krizy misy eto amin’ny Firenena.

-Hisy fihaonana sy raharaha ho vanona ve eto raha mbola mitsabaka lalina amin’ny raharaha politika toy izao ny miaramila?Aoka tsy hadino fa nandritra ny efa-taona latsaka izay dia tsy nitsahatra nampiteny ny anarany tao anatin’ny raharaha politika nisy teto ireo miaramila ireo.

-Hisy fepetra manokana horaisin’ny vondrona iraisam-pirenena sy ny SADC ve manoloana izany?Hatreto tokoa mantsy dia lasa mahakivy ny vahoaka ny fomba hitondran’ny SADC ny famahana ny krizy misy.Ny fanambaràna sy fitanisàna sazy no betsaka fa ny fanatanterahana izany sy ny tena fandraisana andraikitra marina toa tsy hita maso hatramin’izao.

Toa vao maika aza manome hery ny mpanongam-panjakàna izay tarihan-dRajoelina izany satria arakaraky ny handrosoan’ny fotoana no toa mampalefaka sy mampiraviravy tànana ny SADC.Tsy araky ny foto-kevitra nijoroan’ity vondrona iraisam-pirenena ity tany amboalohany izay nanameloka tanteraka tsy misy ady hevitra ny fanonganam-panjakàna sy ny tsy fanajàna ny zon’olombelona nataon’ny mpanongam-panjakàna.

Sanatria ho lasa angady tsy mahatapak’ahitra ve sisa ny SADC ka manakipy ny masony eo anatrehan’ny safidin’ny Malagasy maro an’isa izay hetraketrahina sy hitsakitsahin’ny mpanongam-panjakàna sy ny miaramilany?

Ho an’ny besinimaro,ho an’ny vahoaka Malagasy rehetra izay efa lanaka sy vizaka tanteraky ny fitaingenana tetezamitatra dia tsotra tanteraka ny vahaolana:Mody ary mirotsaka amin’ny fifidianana filoham-pirenena I Ravalomanana.Afaka mifaninana amin’ny daholo izay rehetra tsy mitovy hevitra aminy indrindra fa i Andry Rajoelina ,izay nanongana azy teo amin’ny fitondràna ary tsy mitsahatra milaza fa ny vahoaka no nanongana an-dRavalomanana teo amin’ny fitondrana (Na dia voararan’ny fifanarahana tany Cotonou aza ny filatsahan-kofidian’ireo mpanongam-panjakàna rehetra).

Raha tanteraka izay dia hibaribary sy ho fata-poko fata-pirenena mazava tokoa hoe iza marina no tena Filoham-pirenena mamim-bahoaka sy safidin'ny Malagasy rehetra...Ary ho voahaja daholo koa amin'izay na ny zon'ireo mpanohana an-dRavalomanana na ny an'ireo mpankafy an-dRajoelina na ny an'ireo hery hafa.


(1) Révélations de Lalatiana de Free FM : « Andry Rajoelina avait soutenu financièrement et matériellement les mutins du CAPSAT en 2009 »

(2) Anisan'ireo olona niara-niasa akaiky sy natokisan-dRajoelina tamin'ny fanonganam-panjakàna nataony ny mpanao gazety Fidele Razanapiera sy Lalatiana Rakotondrazafy.Ankehitriny araka ny vaovao farany,manoloana ny fifofoana ny ain'izy ireo sy ny fanenjehan'ny fitondràna FAT tarihan-dRajoelina azy dia miafina any amin'ny tranon'ny masoivoho vahiny iray eto Madagasikara izy ireo ary nanao fanambaràna sy fijoroana vavolom-belona avy any fa nanakaràma sy namatsy vola ny miaramilan'ny CAPSAT i Rajoelina tamin'ny fanonganam-panjakàna nataony izay nanonganany ny Filoha Ravalomanana.

(3) CHRONOLOGIE DES FAITS RELATIFS AU COUP D’ETAT DU 17 MARS 2009/Lieutenant colonel ANDRIANASOAVINA Charles

 

D.Ranaivo