"Tsy hisy fanapahan-kevitra raisina raha tsy tafaverina i dada !"

ARAHO ETO VIDEO+VAOVAO

“Tsy hisy fanapahan-kevitra raisina raha tsy tafaverina i dada !”. Izany no anisan’ny hafatra lehibe nentin’ ny Filoha Marc Ravalomanana raha niditra mivantana teny Amboanjobe izy anio, niarahaba tratry ny taona ary nampahery ny mpandala ny ara-dalàna. Nampatsiahy izy tamin’izany fa Andriamanitra no tompon’ny fahefana ka tokony hatoky Azy ny vahoaka malagasy. 

Nanatitrantitra ny Filoha Ravalomanana ny samy hieritreretan’ny tsirairay ny amin’izay tokony hatao hanafahana an’i Madagasikara sy ny malagasy anatin’izao kirizy politika izao ka hifantoka amin’izay ho fampandrosoana ny firenena, dia ny ezaka amin’ny fametrahana ny fandriampahalemana eo amin’ny firenena.

Nampahery ny vahoaka izy mba hanana fanantenana, tsy ho kivy amin’ny famendrofendroana sy ny fandrangitana samihafa ataon’ny mpandroba ary hanambatra ny hery izay hitondra amin’ny fandresen’ny malagasy. Nanome toky izy fa na dia mangiana aza dia miasa andro aman’alina ho amin’izany ary dia nametraka ihany koa ny fitokisany amin’ny vahoaka malagasy. Ny vahoaka malagasy hoy izy dia vahoaka mahafantatra izay tokony hofidiany hitondra azy.

Nanambara koa ny Filoha Ravalomanana fa mankasitraka ny fanemorana ny datim-pifidianana.Tsy hisy fanapaha-kevitra raisin’ny ankolafy Ravalomanana raha tsy tonga an-tanindrazana izy ary izy tenany no hanambara izay andro ahatongavany.

http://www.tim-madagascar.org/