Marc Ravalomanana: "Tsy azo tsinontsinoavina ny heriny sy ny fitiavan'ny vahoaka azy"

Sary tahiry

Tsy maintsy mivoaka ihany ny marina ary tsy mba maty.Fantatra izao araka ny feo nivoaka tamin’ny masoivohom-pirenena vahiny iray miasa sy monina eto Madagasikara fa mbola tena mamim-bahoaka ary tsy azo tsinontsinoavina ny herin’ny Filoha teo aloha Marc Ravalomanana.

Hay ve misy masoivohom-pirenena vahiny hafa miteny sy maneho hevitra ihany any ambadika any e? Ny mahazatra ny maro mantsy dia ny feon’ny masoivoho frantsay hatrany izay efa fantatra rahateo ny heviny sy fomba fijeriny mikasika ny toe-draharaham-pirenena eto Madagasikara nanomboka ny taona 2009.

Inona tokoa moa izany izao no tena antony goavana mbola hanakanan’ny sasany ny fodian’ny Filoha Ravalomanana eto an-tanindrazany? Efa vita soa aman-tsara iny ny fifidianana nokarakarain’ny CENIT ary efa voapetraka soa aman-tsara io ny filoha vaovao.Raha tsiahivina mantsy ny tantara dia anisan’ny antony goavana nanemorana ny fodian-dRavalomanana hatrany ny fifidianana ary tsy nitsahatra nanamafy izany Ingahy Goldblatt izay masoivohom-pirenena frantsay miasa sy monina eto Madagasikara fa tsy mahazo mody Ravalomanana raha tsy efa vita ny fifidianana, ary mbola ity masoivoho frantsay ity ihany no nanome toky (ireo izay mbola nino azy) fa ny frantsay mivantana no handray an-tanana ny fodian-dRavalomanana an-tanindrazana raha vao vita ny fifidianana.

Mipetraka ny fanontaniana ankehitriny hoe inona ary no mbola sakana amin’ny fodian’ny Filoha Ravalomanana ankehitriny?Etsy andanin’izany dia alaim-panahy ihany hametra-panontaniana hoe “inona tokoa moa no hidiran’i lafrantsa amin’izany?”.Tsy maintsy mahazo fankatoavana avy amin’ny frantsay ve izany ny Filoham-pirenena MALAGASY teo aloha Marc Ravalomanana vao mahazo mody indray eto Madagasikara?

Tsy handany fotoana sy ady hevitra betsaka mikasika ny andraikitr’i lafrantsa tamin’ny krizy (rehetra) nisy teto amin’ny Firenena intsony isika satria efa iaraha-mahalala ny zava-misy, fa ny azo antoka dia tsy very maina ary tsy nandamoka izany ny tolona sy heri-pon’ireo Malagasy izay tsy nitsahatra nitaky ny fodian’ny Filoha Ravalomanana nandritra izay dimy taona izay na dia ninian’ny sasany nafenina aza izany satria dia mivoaka ihany ny feo ankehitriny avy any ambony any fa mbola tena matanjaka ny Filoha Ravalomanana ary tsy azo tsinontsinoavina ny fitiavan’ny Malagasy azy.Inona tokoa re no niseho sy nitranga raha navela nody sy nilatsaka nofidiana filoham-pirenena teo i Ravalomanana e…?

Hamaranana azy dia tsara ny manatitrantitra, ary tsy mampaninona mihitsy ny mamerimberina indrindra ho an’ireo izay mora manadino sy mody manadino fa Filoham-pirenena voafidy sy nametrahan’ny vahoaka Malagasy sy fitokisany in-droa nisesy teto amin’ny Firenena ny Filoha Marc Ravalomanana, ary tamin’izany dia lany tamin’ny fihodinana voalohany hatrany ny tenany (1er tour dia vita); ary fanonganam-panjakàna no nanilihan'ny sasany azy teo amin'ny fitondràna.

Ny toky fitaka fa ny atao no hita e!Ampy izay!!!Aza tapenam-bava intsony ny vahoaka.Aza tsinontsinoavina sy hitsakitsahina an-tapon’ny loha intsony ny zo sy hetahetan’ny Malagasy:”Avelao hody malalaka eto an-tanindrazana ny Filoha Marc Ravalomanana.”

Madagasikara Malalako