Madagasikara: Fifidianana ara-demokratika hoe?

Nanao fialan-tsiny tamin’ny Malagasy ny Filoha Ravalomanana tamin’izay mety ho fahadisoana vitany ka niteraka ny krizy misy ankehitriny.Maro ny nandray izany fihetsika izany ho mahate hidera sy mendrika indrindra manoloana ny fikatsahana fitoniana mba hanjaka eto amin’ny Firenena mialohan’ny fifidianana izay andrandrain’ny rehetra mba hivoahana amin’ny olana goavana mahazo an'i Madagasikara ankehitriny.

hafa dia hafa anefa ny fomba fijerin’ny mpomba sy mpanohana an’i Andry Rajoelina an'izany.Nanambara mantsy Rtoa Lanto Rakotomavo ,izay anisan’ny mpitarika ao amin’ny antoko TGV fa tara loatra hono ny fifonan-dRavalomanana.Ary Andriamanitra hono no mety hamela ny helony fa ny Malagasy kosa tsy hamela azy.

Rtoa Lanto Rakotomavo

Fa iza moa Rtoa Lanto Rakotomavo no mahasahy miteny amin’ny anaran’ny Malagasy?Na ny olona tohanany eo amin’ny fitondrana tetezamitatra tetezamita aza mbola ny herisetra sy miaramila no nametraka azy teo ary nahavita nanao tsinontsinona sy nanosihosy ny zo sy safidin’ireo Malagasy tamin’ny alalan’ny fanonganam-panjakàna.

Tsara koa ny manamarika ary ho an’ireo mpanara-baovao dia mahalala tsara izany fa tsy vao izao ny Filoha Ravalomanana no naneho fialan-tsiny toy izao fa fony mbola teny Iavoloha niaraka tamin'ny vahoaka nisedra ny fampiasan-kery sy fampihorohoroana nataon'ireo andiana miaramila notarihan'i Kolonely Charles ny tenany dia efa nanao izany.

Fa ankoatr’izany,mba inona ny fihetsika sy fandraisana andraikitra noraisin’i Andry Rajoelina manoloana ny krizy ankehitriny izay mampijaly tanteraka sy mampaory ny Malagasy?Raha ny zava-doza iainan'ny Firenena ankehitriny tokoa mantsy no resahina dia milaza miara-mahita ny rehetra ary tsy misy maty harika akory ka tsy hahatadidy ny fanonganam-panjakàna nivaivay sy feno herisetra nataon'Ingahy Andry Rajoelina teto amin'ny Firenena telo taona mahery lasa izay.Tsy ririnin-dasa iny ka tsy hotsaroana fa tantara mipetraka hotsarain'ny rehetra.Koa raha nanao fialan-tsiny sy fifonana i Ravalomanana dia aoka hazava ny resaka ary tsy hohadino fa i Andry Rajoelina koa no anisan'ny tena tompon'andraikitra voalohany amin'ny kizo sy haizina mikitroka misy an'i Madagasikara ankehitriny mba tsy hilazàna hoe vato misakana mihitsy aza mba tsy hivoahan'ny Firenena sy ny vahoaka malagasy amin'izany.

Ny azo antoka Rtoa Lanto Rakotomavo,raha nihaiky ny hadisoany sy nampiseho fihetsika toy ny nataon-dRavalomanana toy izao i Andry Rajoelina dia efa ela izao fahorian’ny Malagasy izao no tsy nisy intsony. Saingy indrisy fa ny iray mifona sy mandefitra fa ny iray kosa ,asa na amin’ny maha tanora saina azy angamba dia manohy hatrany ny fatokisany ny herin’ny basy sy miaramila hatrany.Asa,azo heritreretina ve izany Rajoelina mihaiky heloka sy mifona amin’ny Malagasy izany indray andro any?

Ankoatr’izay,manoloana ny fihazakazaky ny fotoana makany amin’ny fifidianana dia mihazakazaka toy izany koa ireo mpanao politika maniry hilatsaka hofidiana Filoham-pirenena manao fanambaràna etsy sy eroa.Anisan’ireny ry Monja Roindefo sy ry Voninahitsy Jean Eugene izay maniry mafy sy mitady ny fomba rehetra koa toa an'ireo mpanara-dia an'i Andry Rajoelina mba hanakanana ny Filoha Ravalomanana tsy hilatsaka.

A.N.Rajoelina sy Monja R. teo @ kianja 13 Mai 2009

Matoa milatsaka hofidiana Filoham-pirenena izany dia mahafantatra tsara ny zo sy anjara-toeran’ny vahoaka Malagasy eo anivon'ny Firenena;fa indrindra mahafantatra tsara sy manaja ny atao hoe demokrasia.Koa mba aiza ho aiza ny fijerin’Ingahy Monja Roindefo sy ny namany ny zon’ireo Malagasy maro izay tsy nitsahatra nitolona nandritra izay telo taona mahery izay mba hiverenan-dRavalomanana antanindrazana sy mba hahafahany hilatsaka hofidiana indray?

Mbola ilaina ve ny mamerina fa in-droa nisesy ny Filoha Ravalomanana no napetraky ny vahoaka Malagasy teo amin’ny fitondràna tamin’ny alalan’ny fifidianana saingy tamin-kery kosa no nanongana-dRajoelina sy ny andiana miaramilany azy teo.

Koa na ho an-dRajoelina,na ho an’i Monja Roindefo na ho an’i Voninahitsy Jean Eugene,raha fanovàna marina no katsahina,raha demokrasia marina no resaka ary raha fampihavanana sy fitoniana marina no tanjona dia tsotra dia tsotra ny vahaolana:Sahia lehilahy marina,sahia mijoro mifanandrina sy miatrika an'Atoa Marc Ravalomanana amin’ny alalan’ny fifidianana sy safidim-bahoaka mba hohita miharihary sy mazava marina amin’izay hoe iza tokoa no tena Filoha safidy sy eken’ny vahoaka Malagasy hitondra azy.

Rehefa voahaja ny safidim-bahoaka amin'ny alalan'ny fifidianana madio sy mangarahara ary handraisan'ny rehetra anjara dia azo antoka fa hanjaka ho azy ny demokrasia sy ny fihavanana.

D.R.