Tetezamitata: Bizinesy, Fampihorohoroana, Herisetra...

 

Rehefa sady ny mpangalatra ihany no mpitsara,ny polisy ihany no vôlera,ny mpitondra ihany no mafia…ary Remenabingo ihany no Remenabila dia aza gaga mihitsy isika vahoaka raha toa ka ny mpangalatra sy mpanao ratsy indray no mandeha mitory manao gisa lahy mangala-ketsa sy mamo miantso polisy eto amin’ny Firenena.

Mba niandry ny rehetra tamin’ny ampamoaka goavana sy fitoriana nataon’ny Filoha teo aloha Pr Zafy Albert mikasika ny fangalarana sy fanondranana antsokosoko ny harem-pirenena “Bois de rose” ataon’ny lehiben’ny  fitondrana TETEZAMITATRA ankehitriny sy ny ekipany saingy araka ny efa mahazatra sy nampoizin’ny maro dia tsy taitra ary tsy rototra akory ramatoa minisitry ny fitsaran-dRajoelina namaly izany hoe  tsy azo raisina ny fitoriana noho ny antony izay izy irery ihany no mahalala azy ary dia vita hatreo ny resaka.

Ankoatra ny Filoha Zafy Albert dia efa mba nitondra ny fitarainany ihany koa ireo “Olo-be” sy “Tangalamena” avy amin’ny faritra maro manerana ny Nosy mikasika ny “Andramena”(Bois de rose) izay ataon’ny fitondràna FAT-Tetezamitatra ampihi-mamba sy tantely afa-drakotra ankehitriny saingy toy ny fanaon’ny fitondran-dRajoelina izay tsy hitany izay maharatsy azy dia ny “fampihorohoroana mora” sy “herisetra mora” avy hatrany no harangaranga mba hanampenana ny vava sy mason’ireo izay sahy mitsivalana amin’ny “Bizinesin’ny mpitondra tetezamitatra”.

Mikasika izay indrindra,taorian’ny ampamoaka goavana miaraka amin’ny antotan-taratasy sy porofo nataon’ny Tangalamena Zakariasy mikasika ny halatra be vava sy fanondranana antsokosoko ny Andramena Malagasy (Bois de rose) izay efa tena ripaka tanteraka ankehitriny tao anatin’ny taona vitsy monja dia gaga ianao fa ity farany indray (Tangalamena Zakariasy) no nantsoina natao fanadihadiana sy nalaina ambavany teny amin’ny zadarimaria Betongolo.Ary tsy vitan’izay fa dia nahazo ny hafatra sy ny fitoriana mora ihany koa ireo mpanao gazety maromaro izay nanatrika sy nitatitra ny valan-dresaka sy fanadihadiana nataon’Atoa Zakariasy.Nahazo fampiantsoana teny amin’ny Zandarimaria ihany koa mantsy ireo mpanao gazety avy amin’ny MIDI Madagasikara sy La Nation.

Hatraiza marina ny fahalalahan’ny mpanao gazety mitatitra vaovao sy manao ny asany eto Madagasikara raha misy marina izany amin’izao andron’ny tetezamitatra izao?

Rehefa olona ambony mpanefoefo sy mpiara-miasa akaiky amin’ireo mpitondra tetezamitatra ve dia tsy azo kitikitihana sy ambonin’ny lalàna tanteraka na dia efa hita-poko sy hita-pirenena izao aza fa mpangalatra sy mpandika lalàna?

Mandra-pahoviana ny fitsaràna sy ireo milaza azy fa mpitandro ny filaminana no hinia hanakipy ny masony manoloana ny fihoaram-pefy ataon’ny mpitondra tetezamitatra ankehitriny sy ny forongony?

Eto Madagasikara tokoa mantsy ankehitriny dia izay mitaraina sy mitory ary mitatitra ny zava-misy indray no iharan’ny fitoriana sy ny tsindry hazo-lena ary ny sazy.

Tsy mitsahatra ary tsy sasatra ireo mpanakanto sy mpitondra fivavahana ary tompon’andraikitra avy any amin’iny faritra atsimon’ny Nosy iny (Betroka sy ny manodidina) no mitondra vaovao sy fitarainana mikasika ny zava-doza misy any:Tifitifirina an-jambany sy atao vono moka ireo vahoaka,iharan’ny habibian’ny basy marovava sy ny "lance-roquettes" ny mponina ary tsy misy hanavahana fa hatramin’ny zaza amam-behivavy dia manefa avokoa,ripaky ny doro-trano (ataon’ny mpitandro ny filaminana) ny fonenan’ireo mponina hany ka tsy tambo isaina ireo tsy manan-kialofana… Raha tsy hitanisa hafa tsy ireo dia izany no fahoriana sy zava-doza iainan’ireo vahoaka any amin’iny faritra atsimon’ny Nosy iny izao hatramin’ny nahatongavan’ireo miaramila sy “Force spéciale” nalefan’ny mpitondra tetezamitatra.Nisy mihitsy aza renim-pianakaviana nivaky fa naleo lavitra hono tsy nisy ireto miaramila mpitandro ny (fanakorontanana) filaminana ireto toy izay miaina ny zava-doza entiny ankehitriny.

Eo anatrehan’izany dia ireo izay mahasahy mitatitra ny zava-misy (mpanao gazety,mpanakanto,mpitondra fivavahana,sns…) any an-toerana indray no mahazo fanakihanana (mba tsy hilazàna hoe fanapenam-bava) avy amin’ny tompon’andraikitra ambonin’ny mpitandro ny (fanakorontanana) filaminana FAT.Voalaza fa tany tan-dalàna hono i Madagasikara ary manao ny asany ry Kolonely Lylyson Réné sy ny ekipany (Efa hatreny Ambohitsorohitra io kolonely io no nanao ny adidy nampanaovin’I Andry Rajoelina azy :Vakio eto aminy fiteny frantsay

Ny azo antoka aloha hatramin’izao dia mbola tsy hita popoka i Remenabila (Raha tena misy tokoa) fa ny vahoaka kosa no iharan’ny habibian’ny fitaovam-piadiana mahery vaika sy mpitandro (fanakorontanana) filaminana MANARA-PENITRA.

Fehiny dia mitaraina ny tany,mitaraina ny Malagasy.Iharan’ny fampihorohoroana sy ny setrasetran’ny be basy sy ny be volan’ny tetezamitatra avokoa ireo izay sahy mijoro sy milaza ny marina ary manembatsembana ny halavan’ny tetezamitatra eto amin’ny Firenena.

Zandarimaria,miaramila,fitsaràna,fonja:Hita fa vorona azon’adala tokoa ny fanjakàna ankehitriny ka ataon’izao bodo sy adala mpanongam-panjakàna rehetra izao kilalao sy fitaovana amin’izay hitiavany azy avokoa.

Asa!Oviana ianao ry vahoaka Malagasy ,izay lasa tompony mangatak’atiny sisa,vao hifoha tanteraka amin’ny torimasonao ka hijoro ho tompon’andraikitra indray eto amin’ny Firenena.Firenena  izay lasa fananana manokan’ireo olom-bitsy manorina ny fahefàny eo ambony herisetra sy fampihorohoroana ary basy.

Hoy i Mahatma Gandhi,olo-malazan’ny fandriampahalemana ,hoe ny olona iray mahatakatra ny zava-misy sy mijoro dia zava-doza kokoa ho an’ny fitondràna raha mihoatra amin’ny vahoaka alin-kisa matory sy voageja.

Aza adino fa anao i Madagasikara ry Malagasy koa sahia mijoro ho tompon’andraikitra marina sy saro-piaro amin’ny Firenenao mba tsy ho tompony mangatak’atiny amin'ny harem-pirenenao sy ho tompo-trano mihono intsony!Mifohaza ry Malagasy!!!

D.R.