28 martsa 2009 - 28 martsa 2013 :Mitohy ny tolona ataon'ireo vahoaka mpanohana ny filoha Marc Ravalomanana

Vahoaka analiny maro tsy manaiky ny fanonganam-panjakàna...

Anisan’ny daty manan-tantara sy manamarika ny fiandohan’ny tolona nataon’ny vahoaka manohitra ny fanonganam-panjakàna nataon-dRajoelina sy ireo miaramilany ny 28 mantsa.

Raha tsiahivina tokoa ny zava-nisy dia vahoaka alin-kisa nian-dahy sy niam-bavy no vory teo Ambohijatovo tamin’io andro io mba haneho amin’izao tontolo izao fa tsy ara-dalàna ary tsy eken’ny Malagasy ny habibiana sy fampiasan-kery nataon-dRajoelina tamin’ny fangalaram-pahefàna nataony.

Andro vitsy tao alohan’io daty io no nisora-tena ho filoha tao Mahamasina i Andry Rajoelina rehefa avy nanongana ny Filoham-pirenena ara-dalàna Marc Ravalomanana izay voafidim-bahoaka  in-droa nisesy teto amin’ny Firenena.

Toe-javatra izay tsy neken’ny vahoaka mpandala ny ara-dalàna sy ny demokrasia ka nahatonga azy ireo hitolona sy hitroatra ary hanohitra ny fitondràn-dRajoelina mandraka ankehitriny.

Aoka tokoa mantsy tsy hadino fa efa-taona aty aoriana dia mbola mitohy ny tolona na dia efa làlan-tsarotra sy lava aza no nandalovany vokatry ny tsindry hazo-lena sy fampiasan-kery ataon’ny fitondran-dRajoelina.Fampiasan-kery izay mampibaribary ny tahotra sy tsy fatokisan-tena misy eo amin’ity lehiben’ny mpanongam-panjakàna ity.Fampiasan-kery ihany koa manaporofo fa fahefàna tsy ara-dalàna azo tamin’ny basy sy herisetra no eo am-pela-tanany.

Razily sy ireo hery famoretana

Ny mampalahelo dia lasa vorona azon’adala tanteraka ankehitriny ny miaramila sy ny mpitandro ny filaminana ary ny fitsaràna ary lasa fitaovana sy fananan’olo-tokana ara-baki-teny mba ahafahana mifikitra eo amin’ny tetezamitatra.

Ny lasa hono tsy fanadino mba hibanjinana ny ho avy.Anjaran’ny tsirairay no misintona lesona amin’ny zava-nisy nandritra izay efa-taona nisian’ny fanonganam-panjakàna izay.Ary tsy misy jamba mihoatra ny mahiratra nefa minia manakipy ny masony.Zovy tokoa moa no tsy mahatsapa sy tsy mahita ny fahoriana sy fahatràna lalina iainan’ny vahoaka Malagasy sy ny Firenena ankehitriny?Ny tsy fandriam-pahalemana mihoa-papana izay mampandry an-driran’antsy ny vahoaka manginy fotsiny.

Nofidina manokana ity horonan-tsary manamarika loatra ny tantaram-pirenena ity anio.Horonan-tsary izay mahalaza zavatra betsaka ary tsy mila hazavaina eto intsony fa dia aleo ny sary no hiteny sy hanambara hoy ny fitenenana.

Hankalaza ny datin’ny 29 martsa isika rahampitso.Daty goavana izay tsy afa-misaraka amin’ny tantaran’i Madagasikara.Ny zavatra azo antoka sy tsy tokony hampandrimandry manan’aretina ny Malagasy dia mbola tsy vita ny ady sy tolona nataon’ireo zoky sy Ray aman-dRenintsika tamin’ny taona 1947 fa mbola mitohy mandraka ankehitriny izany.Tolona izay tokony handraisan’ny Malagasy tsirairay avy anjara mba hamoahana tanteraka ny Firenena ao anatin’izao haizina sy lavaka mangitsokitsoka misy azy izao.

Napetraka,hono,ny fanamby ary tratra ny tanjona hoy ny lehiben’ny mpanongam-panjakàna raha nikabary izy volana vitsy lasa izay.Koa fanontaniana no apetraka sy hamaranana azy manao hoe:Fahantràna manara-penitra ve no tanjon’ny fanonganam-panjakàna nataony teto amin’ny Firenena?

D.R.