Lainga sy fahantràna manara-penitr'i Rajoelina!Mbola misy mino ihany ve?

Tsy nataotao foana ilay ohabolan-drazana manao hoe « Aleo mifanena amin’ny mpamosavy toy izay mifanena amin’ny mpanadainga ».Ary dia vao maika manamarina tanteraka io teny mifono fahendrena io ny zava-doza iainan’ny vahoaka Malagasy sy ny Firenena ankehitriny.

Raha vao niandoha fotsiny ny fanonganam-panjakàna nataon-dRajoelina dia efa lainga miharo fitaka sy fanaratsiana ranoray no nambaboany sy nandreseny lahatra ireo andian’olona niaraka taminy efa-taona lasa izay.

Lainga sy fitaka,toetra ratsy izay tsy hitan’ny mpanongam-panjakàna izay maharatsy azy satria nahafahany nitazona ilay fahefàna tsy ara-dalàna nandritra ny efa-taona ka dia mbola tohizany mandraka ankehitriny.

Tsy ny vahoaka Malagasy ihany no voasoloky sy voafitaka anefa fa nahazo ny anjarany avokoa hatramin’ireo vondrona iraisam-pirenena isan-tsokajiny izay miara-miasa amin’i Madagasikara amin’ny fitadiavam-bahaolana hivoahana amin’izao krizy goavana tian’ny sasany haharitra izao.

Hatramin’ny sonia nolavina tany Maputo,ka hatramin’ireo kibaombabaomba tsy mipoaka noforonina mba hisamborana ireo mpitarika ny mpanohitra,ny vary 500 Ariary ny Kilao izay nofinofy hatramin’izao raha tsy hitanisa hafa tsy ireo dia taratra fa tena talentan’ireo mpandrombaka fahefàna tamin-kery tokoa ny lainga sy ny filalaovana ny sain’ny vahoaka.

Ny azo antoka dia nentin’ireo mpandainga sy mpisoloky mpanongam-panjakàna anaty lavaka mangitsokitsoky ny fahantràna tanteraka ny Firenena sy ny fiainan’ny vahoaka Malagasy ankehitriny.

-Firifiry ireo zaza Malagasy no voatery tsy mianatra intsony ka lasa manampy tsy fidiny ireo Raiamandreniny eo amin’ny sehatry ny fitadiavam-bola.Raha ny vaovao sy fanadihadiana nivoaka farany teto Antananarivo fotsiny ohatra dia mitombo isan’andro ny isan’ny ankizy tsy mandeha any an-tsekoly intsony vokatry ny hanohanana.Mba manao ahoana izany ny zava-mitranga any ambanivohitra any ?

-Firifiry ireo zazavavy tsy ampy taona atosiky ny fahantràna ka lasa mivaro-tena tsy fidiny.

-Firifiry ireo Malagasy very asa sy noverezina asa (nodorana ny orinasany) vokatry ny krizy sy fanonganam-panjakàna tao anatin’ny efa-taona izay?Tsy fananan’asa sy fahantràna mihoa-papana izay mitarika ny tsy fandriam-pahalemana tsy manam-paharoa ankehitriny.

Tsy hitanisa hafa tsy ireo koa isika fa ankoatr’ireo dia mbola marobe ny ohatra azo raisia izay voka-dratsy nateraky ny lainga sy fisolokian’ny mpanongam-panjakàna avokoa.

Nodradradradraina sy namitahana ny sain’ireo tsy mandinika lavitra tamin’izany fa tsy azo hanina ,hono,ny làlana.Ny tsy tokony hadinon’ireo mpitari-bato vilam-bava sy ireo voakaikitry ny amboa kely tiany ankehitriny anefa dia tsy misy hanina na sakafo tonga eo ambony latabatra sy anaty lovia raha tsy misy ny làlana hitanterana ny vokatra.Ny tatitra nataon’ny sampan-draharaha manokana momba ny vary farany teo dia nilaza fa vokatry ny tsy fisiana sy haratsin’ny làlana no mampidangana ny vidin’ny vary sy ireo kojakoja ilaina amin’ny andavan’andro ankehitriny.Ka tsy azo hanina tokoa ary ve ny làlana ?

Misy oha-pitenenana manao hoe: « Azo atao ny mandainga in-dray mandeha amin’ny olona zato,fa tsy azo atao ny mandainga in-jato amin’ny olona iray. » Ny fanontaniana mipetraka dia hoe :Mba efa nahatonga saina ny Malagasy ve ireo lainga marivo tototra maro nataon’ny mpanongam-panjakàna taminy nandritra izay efa-taona izay ? Ary mbola misy hino ny lainga sy fampanantenana ataon’ny mpanongam-panjakàna ve amin’ny ho avy ?

Farany teo mantsy ,ny marimarina kokoa tamin’ny herinandro iny dia nanaiky ny hiverenan-dRamatoa Lalao Ravalomanana eto antanindrazana mba hitsabo ny reniny marary mafy i Rajoelina.Somary gaga ny rehetra naheno izany satria raha tsiahivina kely ny tantara dia efa nisy fotoana Rtoa Lalao Ravalomanana tonga teny Ivato saika hamangy ny reniny tsy salama ihany saingy herisetra sy fikasihan-tanana ary fandroahana teo no eo avy hatrany no nasetrin’ny mpitondra tetezamita azy sy ny vinanto-vaviny tamin’izany.

Ho an’ireo mpanara-baovao sy efa vita vaksiny amin’ny lainga manara-penitry ny mpitondra ankehitriny kosa dia nahatsinjo sy nahatakatra avy hatrany ny tetika ambadik’i Rajoelina raha vao nametraka ireo fepetra maro isan-karazany tsy maintsy arahin-dRamatoa Lalao Ravalomanana izy;ary tsy gaga firy intsony raha tsy navelan’ny mpitondra FAT hiditra tao anaty fiaramanidina hitondra azy aty Madagasikara indray tamin’ny ora farany ity vadin’ny Filoham-pirenena teo aloha ity.Araho eto ny fanazavàna nomeny mikasika izany.

Mandra-pahoviana no hiaina anaty fitaka sy lainga ary fisolokiana fahefàna toy izao ny Malagasy?

Tsetsatsetsa tsy haritra no hanipihana sy hampatsiahivana fa matoa manongam-panjakàna,matoa manala amin-kery ny mpitondra na filoham-pirenena iray amin’ny toerany (tsy mandalo fifidianana sady voararan’ny lalàna rahateo) dia manana antoka fa mahavita tsaratsara kokoa noho izay vitan’ny teo aloha,afaka mitondra fandrosoana sy fampivoarana haingakaingana kokoa noho ny teo aloha.

Efa-taona aty aoriana nanonganana ny Filoha Ravalomanana anefa i Rajoelina izao,mba aiza ho aiza ny zava-bitany ankoatra ny fahantràna manara-penitra izay iainan’ny vahoaka Malagasy isan’andro?

Efa-taona lasa izay taiza ho aiza no nisy ny Firenena sy ny fiainan’ny Malagasy?Raha ny tatitra sy fanadihadiana navoakan’ny Banky iraisam-pirenena sy ireo manam-pahaizana ara-ekonomika maro dia efa lasa lavitra i Madagasikara amin’ny tanjaka ara-toe-karena raha tsy nisy ny fanonganam-panjakàna nataon’ireo fahavalom-pirenena sy ireo fahavalon’ny fandrosoana.

Ankehitriny i Madagasikara dia mitana ny rambony hatrany eo amin’ny sehatry ny fahantràna sy tsy fandriam-pahalemana eto Afrika sy manerana izao tontolo izao.Ary tsy amin’ireo sehatra ireo ihany fa dia mbola anisan’ny voalohany ihany koa eo amin’ny tsy fanajàna ny zon’olom-belona (Tsy ny Amnesty International mihitsy ohatra no hilaza ny mifanohitra amin’izany) sy fanosihosena ny asa fanaovan-gazety sy falalahana miteny.Porofon’ izany farany teo ohatra ny hetraketraka izay nahazo ny mpanao gazetin’ny fahitalavitra TV Plus,ramatoa Onitiana Realy.

Ankoatr’io koa anefa dia tsara ny mampatsiahy fa nandritra izay efa-taona nisian’ny fanonganam-panjakàna sy ny tetezamita izay dia Hainoamanjery (Radio sy televiziona) maherin’ny 80 no nakaton’ny mpitondra FAT manerana an’i Madagasikara.(Loharanom-baovao: Reporters sans frontières).

Fehiny dia tsy mbola nisy fanapena-bava sy fahantràna ary lainga manara-penitra ohatr’izao teto Madagasikara hatramin’izay.

Tsy misy voro-dolo mitera-boromanga hoy ny fiteny,ary tsy hisy mpanongam-panjakàna hanaiky mora foana ny hanatanterahana fifidianana ara-demokratika izany koa.Ny tahotra sy horohoro ny safidim-bahoaka mihitsy no efa nahatonga azy hanongam-panjakàna fa tsy niandry fifidianana.Ho avy tsy ho ela hono ny fifidianana eto amin’ny Firenena,koa asakasatsika ry Malagasy raha hatoky sy hanantena fifidianana madio sy mangarahara eo ambany fitantanan’ireo mpanongam-panjakàna isika.

Raha ny tondro zotra izay niarahan’ireo milaza azy fa mpitondra sy mpanao politika eto amin’ny Firenena no jerena sy arahana dia voalaza ao fa ilaina ny fitoniana mialohan’ny fifidianana,ary dingana goavana takian’ny fitoniana sy takian’ny tondro zotra ny fiverenan’ireo sesi-tany rehetra tsy misy hakanavaka sy tsy misy fepetra,ny fivoahan’ireo gadra politika rehetra,ary ny fisokafan’ireo Hainoamanjery nakatona rehetra.

Firy amin’ireo fepetra ireo no efa tanteraka ankehitriny?

Fitoniana makany amin’ny fifidianaa tokoa ve no tanjon’ny mpitondra tetezamiitatra tetezamita ankehitriny sa korontana araka ny naverimberin-dRajoelina matetika tao amin’ilay fandaharana fahitalavitra nanasa azy tsy dia ela akory izay (Invité du zoma)?

Soa lavo hahay hamindra,soa kenda hahay hitsako…Hanatra any izany ka alefalefa ihany.Izay mandray dia omena fa izay tsy mandray tsy terena! 

D.R.