Marc Ravalomanana:"Ho vitantsika indray ny hanarina ny simba,hanohy ny lalana izay efa nataontsika ! Fidio Dr Robinson Jean Louis!" [+VIDÉO]

Mitohy ny diantsika miaraka amin'i Dr Robinson Jean Louis...

Andro vitsy sisa dia higadona ny fifidianana filoham-pirenena.Efa-taona sy tapany aty aorian'ny fanonganam-panjakàna mavaivay izay nampitondra takaitra sy loza ho an’i Madagasikara dia ho afaka haneho ny zony sy ny safidiny indray ny vahoaka Malagasy.Latsaka an-katerena sy very hasina  tanteraka ny Firenena,ary miaina fahantràna tsy manam-paharoa vokatr’izany ny 92%-n’ny Malagasy.

Eo anatrehan’izany dia nitondra hafatra sy toro-marika ho an’ny vahoaka ,indrindra ho an'ireo mpifidy, ny Filoha Marc Ravalomanana.Nanantitrantitra sy nanazava ny antony lehibe nanolorany sy nanohanany an'i Dr Robinson Jean Louis izy tamin’izany ary nitondra ny heviny sy fanazavàna ary fandresen-dahatra ireo vahoaka Malagasy mpifidy mba hanohana sy hifidy an’ity kandidàn’ny antoko Avana sy ny Ankolafy Ravalomanana ity.

Toy izao ary ny hafatra sy toro-marika avy amin’ny Filoha Ravalomanana:

Ry vahoaka Malagasy mangetaheta fiovana,mitaky ny famerenana ny tany tan-dalàna,fanajàna ny lalam-panorenana ary ny soatoavina maha Malagasy.

Adidiko,andraikitro amin’izao fotoanan’ny fampihelezan-kevitra sy ny fandresen-dahatra ny mpifidy izao ny manazava amin’ny vahoaka Malagasy indrindra fa ny mpifidy fa izao fifidianana izao dia tsy mitovy amin’ny fifidianana izay natao hatramin’izay teto Madagasikara.Fifidianana izay natao amboletra hoy aho aminareo satria dia tsy nisy najaina na notanterahina izay fifanaraha vita tao anatin’ny tondro-zotra sy ny charte-n’ny “Union africaine”

Fifidianana nanilikilihana satria tsy navela hifidy izay olona tiany hitondra azy ny vahoaka Malagasy ary fifidianana notsabatsabahin’ny vahiny satria dia vitany hatramin’ny nanova ireo “membre”-n’ny CES na ireo mpitsara amin’ny fitsaràna manokana momba ny fifidianana ary dia toy izany koa ny didy aman-dalàna izay manan-kery eto amin’ny tany sy ny fanjakàna.

Fanambintsika hoy aho ny mandresy amin’ity fifidianana ity ka dia fidio Dr Robinson Jean Louis, fa izy no hitako fa favori!

Mahafantatra ary mahalala tsara aho ny zava-misy.Tsy ho voakosoka velively eo anivon’ny Firenena Afrikana ny zavatra nitranga,fanonganam-panjakàna taty Madagasikara tamin’ny 2009,ary maika moa fa ny Malagasy izay niaina nandritra ny efa-taona sy tapany tao anatin’izany krizy politika izany vokatry ny fanonganam-panjakàna.

Hoy aho aminareo hoe zava-dehibe ny mapahafantatra ny vahoaka,ny mpifidy ny zavatra tsara ho fantatra mialohan’ny fifidianana.Mila olom-banona isika,mila olona mendrika sahaza an’i Madagasikara ary hanangana indray Firenena vanona, Madagasikara mendrika eo anatrehan’izao tontolo izao.Tsy sanatriavin’ny vava ho avelantsika ho ohatra ratsy aty Afrika i Madagasikara,ary tsy ekentsika na oviana na oviana ny hametraka an’i Madagasikara hahantra amin’ireo harena hanany.Ka minoa ahy ianareo,matokia ahy ianareo;hiasa miaraka isika.

Fanambintsikany mandresy amin’ity fifidianana ity ka dia “Fidio ary Dr Robinson Jean Louis”

Tongava daholo mifidy na vavy na lahy fa izay koa no hitako fa hampody ahy.Hoy aho aminareo hoe fotoanan’ny fampihelezan-kevitra izao,fotoana hilazàna sy hampahafantarana ny mpifidy ny antony hanohanana kandidà iray.Manohana azy aho,manohana azy ny Avana,ny Movansa Ravalomanana satria nandinika sy namakafaka tsara fa vitany ary sahaza azy ny ho lasa ho filohan’ny repoblikan’i Madagasikara.

Mila fifampatokisana,mila mahay mifandray amin’ny olona,ary mila olona madio sy mendrika,mijoro amin’ny fahamarinana ny Firenentsika.Ireo mpamatsy vola sy ireo Firenen-dehibe izay miaraka amintsika ihany koa dia manara-maso akaiky dia akaiky izao fifidianana izao sy izay olona ho voafidy eo.

Koa hoy aho aminareo,koa hoy aho amin’ny Malagasy hoe mahaiza mifidy,mahaiza mifidy.Tsy hilavo lefona isika eo anatrehan’ny amboletra,na eo anatrehan’ny fanilikilihana na koa ny fitsabatsabahana;fa kosa hasehontsika amin’ny fomba mihaja sy mendrika fa mahalala ny tokony hataony ny vahoaka Malagasy,ary mahita ny lalan-kalehany hivoahana amin’izao fahasahiranana izao.

Ka minoa ahy ianareo fa ho vitantsika indray ny hanarina ny simba,hanohy ny lalana izay efa nataontsika.Ho vitantsika indray ny hampianatra ireo zanantsika ary ny hamerina ny hasin’i Madagasikara eo anivon’ny Firenen-drehetra.

Izany anefa mila fifampatokisana lehibe dia lehibe,izany anefa mila olona mendrika sy sahaza azy.Koa sahia ary miara-dia,hifidy an’i Dr Robinson Jean Louis.

Ny toky fitaka,fa ny atao no hita.Koa raha tiana hotafita hono ny lakana hitàna,avadiho ahitàna ny tevin-damosiny.Raha tiana hateza ny lamba tafiana,jereo irony tenony sao tsy mikitroka.Ary raha tiana ho olom-banona hono ny filoham-pirenena izay hofidiana,fakafakao sao mpanongam-panjakàna.

Ry vahoaka Malagasy!Mahalala ny tokony hataony ary mangetaheta fanovàna sy fampandrosoana.Minoa ahy ianareo fa hiverina amin’ny laoniny ny fiainana.Apetratsika ny tany tan-dalàna,fitondràna tsara tantana,ary indrindra indrindra ny fandriam-pahalemana sy ny filaminana mba hahafahan’ny rehetra mizaka ny zo maha olona ny olona,mba hahafahan’ny rehetra higoka ny hatsembohany sy ny vokatry ny asany.Mampanantena izahay,mampanantena isika fa vitantsika izany,ary hotanterantsika ny mamerina indray an’i Madagasikara eo amin’ny toerana sahaza azy sy mendrika azy.

Mino isika,ary matoky fa momba antsika mandrakariva Andriamanitra.Koa aza mamoy fo,aza manary toky,manàna fanantenana mandrakariva fa momba antsika Andriamanitra,ary tsy mahafoy antsika izy,tia antsika izy.

Samia Tahian’Andriamanitra!