Fodian'ny Filoha Marc Ravalomanana: Inona?, iza tokoa no tena sakana?

Hafa ihany ny Filoham-pirenena tena mamim-bahoaka!

Miharihary toy ny vay an-kandrina ankehitriny ny fihatsaram-belatsihin’ireto milaza azy fa mpitondra.Tsy takona afenina ny fiheveran’izy ireo ny vahoaka Malagasy ho toy ny zaza kely sy bado nanomboka tany amin’ny fanonganam-panjakàna 2009 ka hatramin’ny fifidianana filoham-pirenena farany teo izay nametrahana an’Ingahy Rajaonarimampianina ary mandraka ankehitriny.

Omaly ingahy praiminisitra nilaza fa tsy maninona i Ravalomanana na mbola mijanona atsy Afrika Atsimo aza satria manana trano sy sakafo mahavoky azy izy any.Fa Ingahy Praiminisitra Kolo Roger ve tsy nanana trano sy sakafo nahavoky azy tany Soisa izay firenena nonenany nandritra ny am-polon-taona maro? Inona no nahamaika azy hanao Praiminisitra eto Madagasikara ? Ny fitiavan-tanindrazana tokoa ve ? Enga anie, satria raha fitiavan-tanindrazana no resaka dia manana izany tsy tambo isaina ny Filoha Ravalomanana; ary tsy vitan’ny tia Tanindrazana izy fa naharesy lahatra ny vahoaka Malagasy izay nifidy azy indroa nisesy teto amin’ny Firenena.

Filoham-pirenena voafidin’ny vahoaka Malagasy in-droa nisesy ny Filoha Ravalomanana fa tsy mpitondra fanjakàna notendrena sy nomena seza.

Nanambara koa Rtoa minisitry ny raharaham-bahiny Lala Harisoa Razafitrimo fa tsy misy olona ambonin’ny lalàna eto raha nanisy teny mikasika ny fodian-dRavalomanana eto an-tanindrazana ny tenany.Raha tena hiresaka lalàna marina isika Rtoa minisitra dia aza asiana mizàna tsindrian’ila sy zanak’Ikalahafa ity raharaham-pirenena ity.Ampiharo amin’ny rehetra ny lalàna (na dia tsy minisitry ny fitsaràna aza ianao) manomboka hatrany amin’ireo mpanongam-panjakàna izay efa iarahan’ny rehetra mahalala hoe iza avy izy ireo.Tsy mila mandeha lavitra ianao fa feno olona mpanongam-panjakàna sy voarohirohy tamin’ny fanondranana antsokosoko ny harem-pirenena manodidina anao manomboka any amin’ny an-tanatohotra ambony indrindra ka hatrany amin’ny farany ambany.

Aoka tsy hofitahina sy atao tsinontsinona intsony ny vahoaka Malagasy amin’ity rasaka fampihavanam-pirenena ity.Mody tsy miady tsy miady nefa ny kibay an-kelika ihany.Efa nangataka ny mba hisian’ny fanadihadiana lalina sy fanadihadiana iraisam-pirenena mikasika ny raharaha 7 febroary 2009 ny Filoha Ravalomanana saingy mahagaga fa misy miasakana foana izany mandraka androany.Ary rehefa hampihantra lalàna sy hanao fanadihadiana ihany tsy tsara ve raha hitarina farafaharatsiny hatrany amin’ny raharaha « Alatsinainy mainty » na 26 janoary 2009 ny resaka izay vanin’andro manjombona koa satria namoizana aina Malagasy an-jatony mahery miampy ireo orinasa maro be izay norobaina sy nodorana tao anatin’ny fotoana fohy ka niteraka fahapotehana ara-ekonomika goavana ho an’ny Firenena ary mbola baben’ny 92%-n’ny malagasy mahantra ankehitriny.Ny fanondranana antsokosoko ireo harem-pirenena toy ny « andramena » (bois de rose), biby, volamena,sns tsy asian-teny intsony.

Raha tena ampiharina amin’ny rehetra ny lalàna,raha atao mazava sy tsy mitanila ny fanadihadiana rehetra mikasika ireo tranga ireo dia tokony ho samy afaka mamaly ny tsirairay hoe « Iza no tena ambonin’ny lalàna sy tsy refesi-mandidy eto »

Ny zavatra azo antoka dia tsy voafehin’ny fotoana sy tsy voasakan’iza na iza ny fitiavan’ny vahoaka maro an’isa ny Filoha Ravalomanana.Ny fanaratsiana, ny fanedrikendrehana ary ny fanaovana tsindry hazo-lena azy dia tsy mampiova fa vao maika mampiakatra ny fitiavan’ny vahoaka azy.

Ary sao dia izay laza sy fitiavan’ny vahoaka ny Filoha Ravalomanana izay kosa aza no tena antony goavana atahoran’ny sasany sy ny reny malalany azy ? Tena mbola hafa mihitsy tokoa aloha izany Filoham-pirenena tena voafidy sy mamim-bahoaka izany e!

D.R.