Marc Ravalomanana: Filoha sahy! Tsy matahotra mijoro amin'ny fahamarinana

Marc Ravalomanana tonga teo Faravohitra miatrika ireo vahoaka mpanoana azy

Na dia teo aza ny sakana maro isan-karazany apetraky ny fitondràna ankehitriny mba hanakanana ny Filoha Marc Ravalomanana tsy hody an-tanindrazana dia tsy nahasakana azy izany. Noporofoin’ity Filoha mamim-bahoaka ity teo imason’izao tontolo izao omaly fa vonona sy sahy izy hiverina an-tanindrazana mba hitondra ny anjara birikany amin’ny fanarenana sy fampandrosoana indray ny Firenena Malagasy izay latsaka an-katerena tanteraka ankehitriny. “Ny ahy rehefa lazaiko dia tsy maintsy tanterahiko” hoy ny Filoha Marc Ravalomanana.

Tamin’ny fotoana tsy nampoizin’ny rehetra no nigadonany tetsy amin’ny trano fonenany tetsy Faravohitra. Niharihary teo anatrehan’izao tontolo izao omaly fa vahoaka sesehena faly sy tony ary milamina tsara no nitsena azy na dia tampoka tanteraka aza izany fa tsy araka ny hevitra vohizin’ny sasany tsy misy farany hoe hiteraka korontana ny fiverenan’ny Filoha Marc Ravalomanana eto Madagasikara. Ny nifanohitra amin’izany aza no niseho satria dia nahavaky vava ny rehetra ny nahita ny fihetsiky ny fitondràna Rajaonarimampianina tamin’ny alalan’ireo mpitandro ny filaminana nisambotra ny Filoha Ravalomanana. Tsy nisy fanajàna na dia ny mahaolom-belona fotsiny ihany aza ankoatra ny maha Filoham-pirenena teo aloha azy nasehon’ireo mpitandro ny filaminana izay nirahin’ny fitondràna hisambotra azy tao amin’ny trano fonenany fa avy hatrany dia tamin-kerisetra tsy manam-paharoa no nanatanterahana izany.

Vakio koa: Marc Ravalomanana: " Tsy matahotra aho hiatrika fitsaràna mba hilazàko ny marina! (...) Ny andro sisa iainako dia hanarenako ny Firenena."

Raha ny zava-nisy teny an-toerana izay navoakan’ny mpanao gazety teto Madagasikara sy ireo gazety vahiny manerana izao tontolo izao avy eo dia tifitra variraraka tamin’ny setroka mandatsa-dranomaso, izay mahery vaika dia mahery vaika avy hatrany no nanaparitahan’ireo zandary sy miaramila ireo vahoaka vory maro be tonga teny Faravohitra; ary taorian’izany dia niditra an-tsehatra ireo andiana miaramila “GSIS” misaron-tava sy mirongo fitaovam-piadiana mahery vaika nampiasa herisetra sy nanapotika ny vavahady vy fidirana ao amin’ny trano fonenan’ny fianakaviana Ravalomanana. Tao anatin’ny fihetsika feno herisetra tanteraka no nanatanterahan’ireo “GSIS” izany satria dia “fusil d’assaut, calibre 12 » izay basy mahery vaika mihitsy no nitifiran’ireto farany ilay vavahady. Vokany ary manaporofo izany herisetra izany dia nitsonika tanteraka ireo vy matevina mandrafitra ilay vavahady araka ny hita eto amin’ny sary.

Diam-bala "calibre 12" eo amin'ny vavahady Vy (Sary: Daniel Rakotoarisoa)

Eo anatrehan’izany fisamborana feno herisetra sy habibiana izany dia nanaitra sy nahatalanjona ny maro ny fanambaràna nataon’ny Filoha Rajaonarimampianina teny Iavoloha. Nanambara mantsy ity farany fa tsy nosamborina na nogadraina ny Filoha teo aloha Marc Ravalomanana fa voatery natao izao fihetsika izao mba hiarovana ny ainy.

Aleo hazava ny resaka fa ireny fihetsika mamoafady nataon’ny mpitandro ny filaminana ireny dia “fangalàna an-keriny” no anarany. Fangalàna an-keriny izay sady tsy manaja ny zon’olombelona no manosihosy sy manao tsinontsinona tanteraka ny hasin’ireo vahoaka Malagasy maro be izay tsy mety mitsahatra manohana ny Filoha Ravalomanana nandritra izay enin-taona nanesoran’ireo mpanongam-panjakàna azy teo amin’ny fitondràna izay.

Ireo andiana miaramila hisambotra ny Filoha Ravalomanana (sary: RFI)

Nanatitrantitra sy namerimberina ny Filoha Marc Ravalomanana fa tonga hitondra fampihavanana sy fitoniana ary fampandrosoana. Vonona hifanome tànana amin’ny fitondràna ankehitriny ny tenany ary vonona hifamela amin’ny filohan’ny tetezamita teo aloha Andry Rajoelina. Koa raha fampihavanana marina no tanjona izay fototry ny fampandrosoana ny firenena sy vahaolana hialàna amin’ny krizy ankehitriny dia mipetraka ihany ny fanontaniana manao hoe: “Inona marina no tena tanjon’ny fitondràna Rajaonarimampianina manoloana izao fisamborana ankeriny mihantra amin’ny Filoha Marc Ravalomanana izao?”

Marihina, ary aoka tsy hadino fa Filoha am-perin’asa sy nametrahan’ny vahoaka Malagasy ny fitokisany in-droa nisesy tamin’ny alalan’ny fifidianana teto amin’ny Firenena ny Filoha Marc Ravalomanana.

Ny azo antoka dia misedra sy miharitra ny mafy maro ny Filoha Ravalomanana manaloana ny fasahiany mijoro amin’ny marina. Tsy vitan’ny iharan’ny fanapotehana ara-politika ny tenany fa etsy andanin’izany dia ianjadian’ny tsy rariny sy ny tsindry hazolena tanteraka ihany koa ny fiainany manokana miaraka amin’ny vady aman-janany nandritra izay enin-taona izay.

Raha ny vaovao farany heno dia notazomin’ny fitondràna tao amin’ny toby Ratsimandrava etsy Andrefan’Ambohijanahary ny Filoha Marc Ravalomanana omaly hariva. Misy vaovao hafa maro koa anefa milaza fa nafindra toerana izy ary tsy fantatra mazava izay tena toerana misy azy marina amin’izao fotoana izao.

Sahy izy na dia sakanana, Marc Ravalomanana!* Notanterahiny ny teniny, ary tonga tokoa izy. Tsy mba mpitari-bato vilam-bava sy mpampandry adrisa ny tenany fa avy hatrany dia “asa fa tsy kabary”. Mila ahy, mila anao…Mila antsika rehetra i Madagasikara! Mifohaza ry Malagasy!

Indro zaraina amintsika ny toromarika sy vaovao voalohany avy amin'ny Filoha Ravalomanana raha nitafa mivantana tamin'ireo vahoaka maro be tonga teny Faravohitra ny tenany.

Madagasikara Malalako